शाओमीको ईभी रणनीति : टेस्ला र बीवाईडीसँग प्रतिस्पर्धा गर्दै युरोपतर्फ पाइला

शाओमीले गत वर्ष आफ्नो पहिलो इलेक्ट्रिक कार एसयू७ लन्च गरेपछि चीनमा राम्रो सफलता हात पारेको छ। अब शाओमीको ध्यान युरोपेली बजारमा केन्द्रित छ । कम्पनीले २०२७ सम्ममा युरोपमा आफ्नो पहिलो ईभी लन्च गर्ने योजना बनाएको छ। युरोपमा शाओमीको मुख्य प्रतिस्पर्धी टेस्ला र बीवाईडी हुनेछ ।

रिपोर्टका अनुसार शाओमीले आफ्नो ईभी व्यवसायलाई द्रुत गतिमा विस्तार गर्ने रणनीति लिएको छ। हालै दोस्रो इलेक्ट्रिक कार बजारमा उतारेपछि कम्पनीको त्रैमासिक राजस्वमा ३१ प्रतिशतले वृद्धि भएको छ। यसपछि कम्पनीका अध्यक्ष लु वेइबिङले सार्वजनिक रूपमा युरोपेली बजारमा विस्तार गर्ने योजनाबारे जानकारी दिएका छन्।

तर, युरोपमा प्रवेश शाओमीका लागि सहज छैन। चिनियाँ ईभी कम्पनीका लागि युरोप सधैं आकर्षक भए पनि त्यहाँ व्यापारिक चुनौतीहरू ठूला छन्। युरोपमा कार आयात गर्दा ४८ प्रतिशतसम्म कर र शुल्क लाग्ने सम्भावना हुन्छ, जसमा १० प्रतिशत आधार आयात शुल्क र थप ३५-३८ प्रतिशतको अतिरिक्त कर समावेश हुन्छ। यही कारणले गर्दा शाओमीलाई युरोपमा आफ्नो स्थान बनाउन चुनौतीपूर्ण हुनेछ।

शाओमीको पहिलो इलेक्ट्रिक कार एसयू७ अहिले कम्पनीको प्रमुख मोडल हो। यो पूर्ण आकारको सेडान हो र कम्पनीले अहिलेसम्म यसका १ लाख युनिट उत्पादन गरिसकेको छ। शाओमी एसयू७ को म्याक्स भेरिएन्टमा १०१ किलोवाट आवर क्षमताको ब्याट्री प्याक दिइएको छ, जसले एक पटकको चार्जमा ८०० किलोमिटरसम्म दूरी तय गर्न सक्ने दाबी गरिएको छ ।

यसका दुई भेरिएन्ट एसयू७ र एसयू७ म्याक्स मध्ये एसयू७ म्याक्स अत्यन्तै शक्तिशाली छ। यो केवल २.७८ सेकेन्डमै ० देखि १०० किलोमिटर प्रतिघण्टाको गति लिन सक्छ भने १०.६७ सेकेन्डमै ० देखि २०० किलोमिटर प्रतिघण्टामा पुग्छ। यसको अधिकतम गति २६५ किलोमिटर प्रतिघण्टा रहेको छ। यसले ६६८ बीएचपीको पावर र ८३८ एनएमको टर्क उत्पादन गर्छ ।