के हो निर्वाचनका लागि भारतले दिएको ‘वान टन’ गाडी ? के छ यसको विशेषता ?

भारत सरकारले नेपालमा हुन लागेको निर्वाचनका लागि दिएको ‘वान टन’ गाडीको चर्चा चुलिएको छ । वीरगञ्जस्थित भारतीय महावाणिज्य दूतावासमा आयोजित कार्यक्रममा महावाणिज्यदूत देवी सहाय मिनाले पर्साका प्रमुख जिल्ला अधिकारी भोला दाहाललाई ३० थान वान टन ट्रक र अन्य निर्वाचन सामग्री औपचारिक रूपमा हस्तान्तरण गरेका थिए ।

हिजो यस वारेमा समाचार सार्वजनिक भयो । भारत सरकारले यो भन्दा पहिले पनि ५८० भन्दा बढी सवारी साधन र अन्य सामग्री हस्तान्तरण गरिसकेको छ । यो भन्दा पहिले भारत सरकारले महिन्द्रा बोलेरो लगायतका गाडी हस्तान्तरण गरेको थियो ।

तर पछिल्लो समयमा हस्तान्तरण गरिएको ‘वान टन’ गाडी भने आफ्नो ब्रान्ड र नाम भन्दा पनि ‘वान टन’ बोक्न सक्ने क्षमताका कारण चर्चित बनेको छ । वास्तवमा यो भारतीय अटोमोबाइल निर्माता कम्पनी अशोक लेल्यान्डद्वारा उत्पादन गरिएको ‘साथी’ पिकअप हो । यसको पेलोड क्षमता वान टन अर्थात एक हजार किलोग्राम भन्दा बढी ११२० किलोग्राम छ । यसकारण यो गाडीलाई वान टन भनिएको हो ।

भारतीय बजारमा गत वर्ष मात्र लन्च गरिएको साथी पिकअप नेपाली बजारमा भने बिक्रीका लागि अझै उपलब्ध भएको छैन । भविष्यमा यो गाडी नेपाली बजारमा पनि उपलब्ध हुन सक्ने नेपालका लागि अशोक लेल्यान्डको आधिकारिक वितरक आईएमई मोटर्स स्रोतको भनाइ छ ।

थोरै सामान एक स्थानबाट अर्को स्थानमा ओसार्नका लागि यस प्रकारका पिकअपको प्रयोग गरिन्छ । साथी पिकअपमा १.५ लिटरको टर्बोचार्ज्ड, थ्री सिलिन्डर डिजेल इन्जिन रहेको छ । यसले ३३०० आरपीएममा ४५ एचपी पावर र १००० देखि २४०० आरपीएममा ११० एनएम टर्क जेनेरेट गर्छ ।

यसमा ८.२ फिटको लोडिङ डेक, ४० लिटरको इन्धन ट्यांकी तथा आधुनिक क्याबिन रहेको छ । सामान डेलिभरीका लागि यो गाडी निकै नै उपयोगी मानिन्छ ।