एमजीले सार्वजनिक ग-यो प्यारासुटसहितको इलेक्ट्रिक कन्सेप्ट हाइपर कार ईएक्सई १८१

बेइजिङ अटो शोको पूर्वसन्ध्यामा एमजी कम्पनीले इलेक्ट्रिक कन्सेप्ट हाइपरकार ईएक्सई १८१ प्रस्तुत गरेको छ । कम्पनीले सो कार ईएक्सई १८१ बाट प्रेरणा लिएर निर्माण गरेको हो ।

कम्पनीले सो कारको डिजाइन निकै उत्कृष्ट तरिकाले गरेको छ । यसको डिजाइन एलियन सिप यूएफओ जस्तो देखिन्छ । सिङ्गल सिट भएको कन्सेप्ट इलेक्ट्रिक हाइपरकारमा एयरब्रेक जस्ता फिचर दिइएको छ । यसको गति तीव्र भएको हुनाले यसलाई रोक्न प्यारासुटको प्रयोग गर्नुपर्नेछ ।

हालको लागि एमजीले सो हाइपरकारको कन्सेप्ट मोडल मात्र प्रस्तुत गरेको हो । कारको बारेमा अधिक जानकारी सार्वजनिक भएको छैन । रिपोर्टका अनुसार सो कारले १.९ सेकेन्डमा ० देखि १०० किलोमिटर प्रतिघण्टाको गतिमा चल्न सक्नेछ । यसको टप स्पिड पनि ४१५ किलोमिटर प्रतिघण्टा हुने अपेक्षा गरिएको छ । कम्पनीले यसमा १ हजार हर्स पावरभन्दा बढी पावर दिने मोटर जडान गर्नेछ ।

कम्पनीले यसलाई कन्सेप्ट हाइपरकारका रुपमा मात्रै प्रस्तुत गर्दै आएको छ । सो कारको प्रोडक्सन भर्सन अहिलेसम्म तयार भएको छैन । रिपोर्टका अनुसार यसको प्रोडक्सन भर्सन ल्याउन अझै २ देखि ४ वर्ष लाग्ने अनुमान गरिएको छ ।