नेपाल भित्रियो यामाहा एफजेड–एक्स, २५ हजार तिरेर आजैदेखी बुकिङ लिन सकिने

यामाहाको वहुप्रतिक्षित नियो रेट्रो स्टाइलयुक्त नयाँ वाइक एफजेड–एक्स नेपाल भित्रिएको छ । आजदेखी देशभरका शोरुममा उपलब्ध यो वाइकको बुकिङ खुल्ला गरिएको आधिकारिक वितरक एमएडब्लु इन्टरप्राइजेज स्रोतले बताएको छ ।

४ लाख २६ हजार ९ सय रुपैयाँ मूल्य निर्धारण गरिएको यो वाइकलाई २५ हजार रुपैयाँ तिरेर वुकिङ लिन सकिने उक्त स्रोतको भनाई छ । यसै महिनाको अन्तिमसम्ममा औपचारिक लन्च गर्ने तयारी गरिएको यो बाइकलाई हात पार्न ग्राहकले सो समय अवधीसम्म कुर्नुपर्ने देखिन्छ ।

यो नयाँ मोटरसाइकलमा १४९ सीसीको एयर कुल्ड इन्जिन जडान गरिएको छ । जसले १२.४ एचपीको पावर र १३.३ एनएमको टर्क जेनेरेट गर्नेछ । सो इन्जिनलाई ५–स्पिड कन्स्ट्यान्ट मेस ट्रान्समिसनले जोडेको छ ।

नयाँ डिजिटल कन्सोल जडान गरिएको यो मोटरसाइकलमा टेलिस्कोपिक फ्रन्ट सस्पेन्सन र मोनोसक रियर सस्पेन्सन दिइएको छ । ब्रेकिङका लागि सिंगल च्यानल एबीएसका साथ डिस्क ब्रेक दिइएको छ । यो नयाँ वाइकमा भएको ब्लुटुथ कनेक्टिभिटीमार्फत यामाहाको वाई–कनेक्ट एप प्रयोग गर्न सकिन्छ । यसले स्मार्टफोनलाई जोड्छ र मिस्ड कल, इमेल, म्यासेज र फोनको ब्याट्री लेवल आदि थाहा पाउन सकिन्छ । यसले मोटरसाइकलको इन्जिन आयल र ब्याट्री लेवल समेत थाहा दिन्छ ।

हेर्दा सामान्य लागे पनि यसमा धेरै आधुनिक फिचर राखिएका छन । यामाहा एफजेड–एक्समा अघिल्लो र पछिल्लो भागमा एलईडी लाइट, एलईडी फ्ल्यासर, सिंगल च्यानल एबीएस, साइड स्ट्यान्ड इन्जिन कटअफ र ब्लक प्याटर्न टायर जस्ता फिचर उपलब्ध छन ।