चर्चामा शाओमी वाईयू७ इलेक्ट्रिक एसयूभी, ३ मिनेटमै २ लाख युनिट बुकिङ, ८३५ किमी रेन्ज

चीनको स्मार्टफोन निर्माता कम्पनी शाओमीले आफ्नो दोस्रो इलेक्ट्रिक कार शाओमी वाईयू७ एसयूभी लन्च गर्दै इलेक्ट्रिक गाडीको क्षेत्रमा ठूलो चर्चा बटुलेको छ । आकर्षक डिजाइन, दमदार प्रदर्शन र लामो रेन्जका साथ आएको यस एसयूभीले टेस्ला मोडल वाईलाई टक्कर दिने दाबी गरिएको छ।

शाओमी वाईयू७ तीन भेरिएन्टमा लन्च गरिएको छ । सो एसयूभीको बुकिङ खुला भएको ३ मिनेटभित्रै २ लाख युनिट बुक हुनुले यसको लोकप्रियता स्पष्ट देखाउँछ। यसको मूल्य र सुविधा संयोजनले बजारमा हलचल ल्याउने निश्चित छ।

सो कारको सबैभन्दा ठूलो विशेषता भनेको यसको रेन्ज हो । वाईयू७ मा ९६.३ किलोवाट आवर ब्याट्री दिइएको छ जसले ८३५ किलोमिटरसम्मको रेन्ज प्रदान गर्छ। यसको प्रो र म्याक्स भेरिएन्टमा पनि उच्च क्षमताका ब्याट्री समावेश छ, जसले क्रमशः ७७० किलोमिटर र ७६० किलोमिटरसम्मको रेन्ज दिन्छ ।

वाईयू७ को सिंगल मोटरले ३१९ एचपी र ५२८ एनएमको टर्क उत्पन्न गर्छ र ० देखि १०० किलोमिटर प्रतिघण्टा मात्र ५.८८ सेकेन्डमा पुग्छ । प्रो र म्याक्स भेरिएन्टमा ड्युअल मोटर र एडब्ल्युडी सिस्टम समावेश छ, जसले तीव्र गति र उच्च पावर प्रदान गर्छ।

शाओमी वाईयू७ को बाहिरी डिजाइन अत्यन्तै आकर्षक देखिन्छ। यसमा एलईडी हेडलाइट, फ्लश फिटेड डाेर ह्यान्डल र स्टाइलिश अलोय ह्विल समावेश गरिएको छ । यसको लम्बाइ झण्डै ४ मिटर, चौडाइ २ मिटर, उचाइ १६०० एमएम र ह्विलबेस ३००० एमएम रहेको छ।

सो एसयूभीमा १६.१ इन्चको टचस्क्रिन इन्फोटेनमेन्ट डिस्प्ले, प्यानोरामिक डिस्प्ले, ड्युअल रियर स्क्रिनसहितका मनोरञ्जन सुविधा, रिमोट कन्ट्रोल र एडास प्रविधि समावेश छ। साथै, लिडार र राडार आधारित सुरक्षा प्रणाली, स्मार्ट भण्डारण र लक्जरी सिटिङ पनि समावेश छ ।