कुनै समयमा लोकप्रिय मानिएको फोर्ड क्याप्री अब इलेक्ट्रिक भर्सनमा, ६२७ किमी रेन्ज दिने

फोर्डले आफ्नो पुरानो कार फोर्ड क्याप्रीको इलेक्ट्रिक भेरिएन्ट ल्याएको छ । जसलाई म्यानचेस्टर युनाइटेड र फ्रान्सका अन्तर्राष्ट्रिय खेलाडी एरिक क्यान्टोनाले विश्वसामु प्रस्तुत गरेका थिए । सो कार हाललाई युरोपेली बजारमा ल्याइएको हो ।

सन् १९६८ मा प्रस्तुत गरिएको फोर्ड क्याप्रीलाई युरोपको लागि मस्ताङको रूपमा प्रचार गरिएको थियो । फोर्ड क्याप्री स्टाइलिश २ डोर कुपे थियो जुन फोर्ड युरोपको सबैभन्दा प्रसिद्ध कार कोर्टिनामा आधारित थियो ।

नयाँ फोर्ड क्याप्री ईभी ३ बक्स क्रसओभर सेडान कार हो । यसमा हाई राइडिङ स्ट्यान्स र रुफ जस्तै फास्टब्याक दिइएको छ । साथै उत्कृष्ट डिजाइन गरिएको हेडलाइट प्रदान गरिएको छ । सो कारको इन्टेरियरमा १४.६ इन्चको पोर्ट्रेट शैलीको इन्फोटेनमेन्ट स्क्रिन फ्लोटिङ सेन्टर कन्सोल रहेको छ । यसको स्टेयरिङ ह्विल पुरानो मोडल क्याप्रीको जस्तै देखिन्छ ।

फोर्ड क्याप्री ईभीको पावरट्रेनको लागि ७७ किलोवाटको ब्याट्री प्याक दिइएको छ, जसले ६२७ किलोमिटरको रेन्ज दिन्छ। सो कार ६.४ सेकेण्डमा १०० किलोमिटर प्रतिघण्टाको गतिमा पुग्न सक्ने कम्पनीको दाबी छ । यसको टप एडब्ल्युडी भेरिएन्ट भीडब्ल्यु आईडी.५ जीटीएक्स ट्रिममा ७९ किलोवाट ब्याट्री प्याक दिइएको छ, जसले ५९२ किलोमिटरको रेन्ज दिन्छ । सो भेरिएन्टले ५.३ सेकेन्डमा १०० किलोमिटर प्रतिघण्टाको गतिमा पुग्छ ।

फोर्ड क्याप्री ईभी अहिले युरोपमा लन्च गरिएको छ । भविष्यमा कुनै समयमा नेपालमा पनि आउने अनुमान गर्न सकिन्छ ।