इतिहास: थोमस एडिसनको कम्पनी छाडेपछि हेनरी फोर्डले सुरु गरेका थिए फोर्ड कम्पनी

विश्वको सबैभन्दा ठुलो कार कम्पनी मध्येको एक फोर्ड र बत्तीको बल्बको आविष्कार गर्ने थोमस एडिसनबीचको मित्रता अमेरिकामा चर्चित छ । तर के तपाईलाई थाहा छ आफ्नै कम्पनी सुरु गर्नु अघि हेनरी फोर्डले थोमस एडिसनको कम्पनीमा पनि काम गरेका थिए ।

फोर्ड सुरु गर्नु अघि, हेनरी फोर्डले थोमस एडिसनको कम्पनी एडिसन इलुमिनेटिङमा काम गरेका थिए । हेनरी फोर्डले न्यूयोर्कमा थोमस एडिसनको कम्पनीको सम्मेलनमा भाग लिएका थिए । यही सम्मेलनमा दुवैको पहिलो भेट भएको थियो । भेटका क्रममा दुवैले कुराकानी पनि गरे र त्यति बेला हेनरीले आफ्नो कार देखाएका थिए, जसको एडिसनले प्रशंसा गर्दै यसलाई निर्माण गरिरहन सुझाव दिए । त्यसपछि मात्रै उनीहरुको मित्रता सुरु भएको थियो  ।

हेनरी फोर्डले एडिसनको कम्पनीमा करिब ८ वर्ष मुख्य इन्जिनियरको रूपमा काम गरेका थिए । त्यसपछि फोर्डले थोमस एडिसनको कम्पनी छोडे। त्यति बेलासम्म उनीहरुको मित्रता निकै राम्रो बनिसकेको थियो । यसपछि, हेनरीले आफ्नो व्यवसाय सुरु गर्न धेरै कम्पनीहरू गठन गरे, तर उनको पहिलो सफलता फोर्ड कम्पनीबाट भएको थियो । उनले १६ जुन १९०३ मा फोर्ड मोटर कम्पनी सुरु गरेका थिए ।  

हेनरी फोर्डले आफ्नो पहिलो कार ४ जुन, १८९६ मा निर्माण गरेका थिए । उनले क्वाड्रिसाइकल नामक कार निर्माण गरेका थिए, जसमा दुई सिलिन्डर इन्जिन प्रयोग गरिएको थियो । चालकका लागि साइकलको सिट र साइकलको टायर प्रयोग गरिएको थियो। यसको वजन ५०० पाउन्ड थियो र यसको गति लगभग २० माइल प्रति घण्टा थियो।

फोर्ड विश्वभर आफ्नो शक्तिशाली कारका लागि परिचित छ। हाल कम्पनीले मुस्ताङ, एभरेष्ट, माभेरिक, ब्रोन्को जस्ता धेरै शक्तिशाली कारहरू बिक्री गगरिरहेको छ ।