स्पोर्ट्स बाइक सेग्मेन्टमा नयाँ विकल्प थप्दै केटीएम आरसी १६० लन्च

स्पोर्ट्स बाइक सेग्मेन्टमा नयाँ विकल्प थप्दै केटीएमले नयाँ फुल फेयर्ड स्पोर्ट्स बाइक आरसी १६० लन्च गरेको छ । रेसिङ डीएनएबाट प्रेरित सो बाइक १६० सीसी सेगमेन्टमा प्रदर्शन, डिजाइन र किफायती मूल्यको सन्तुलन खोज्ने सवारलाई लक्षित गरेको छ ।

केटीएम आरसी १६० मा १६४.२ सीसी क्षमताको लिक्विड-कुल्ड, सिंगल-सिलिन्डर एसओएचसी इन्जिन दिइएको छ। सो इन्जिनले ९५०० आरपीएममा १९ बीएचपी पावर र ७५०० आरपीएममा १५.५ एनएम टर्क उत्पादन गर्छ। यसलाई असिस्ट र स्लिपर क्लचसहितको ६ स्पिड गियरबक्ससँग जोडिएको छ । बाइकको उच्चतम गति ११८ किलोमिटर प्रतिघण्टा रहेको छ ।

सो बाइकमा १३.७५ लिटर क्षमताको मेटल फ्युल ट्याङ्की दिइएको छ । बाइकमा पूर्ण एलईडी लाइटिङ सेटअप, स्प्लिट ह्यान्डलबार र एलसीडी इन्स्ट्रयुमेन्ट क्लस्टर जस्ता फिचर समावेश छ । यसको टीए भेरिएन्टमा नेभिगेसन सपोर्ट पनि उपलब्ध गराइएको छ। साथै, सुपरमोटो मोडसहितको एबीएस, इलेक्ट्रोनिक फ्युल इन्जेक्सन र स्लिपर क्लचजस्ता प्रविधि समावेश गरिएको छ ।

केटीएम आरसी १६० को लुक पूर्ण रूपमा केटीएमको रेसिङ बाइकहरूबाट प्रेरित देखिन्छ। यसमा सस्पेन्सनका लागि अगाडि ३७ एमएम अपसाइड-डाउन फोर्क र पछाडि मोनोशक युनिट प्रयोग गरिएको छ। बाइकमा १७ इन्चका अलोय ह्विल दिइएको छ, जसमा अगाडि ११०/७० र पछाडि १४०/६० सेक्शनका टायर छ । ब्रेकिङका लागि अगाडि ३२० एमएम र पछाडि २३० एमएम डिस्क ब्रेक दिइएको छ ।