नेपाल भित्रियो हुन्डाईको इलेक्ट्रिक कार कोना फेसलिफ्ट, मूल्य पहिले भन्दा ३ लाख बढी

काठमाडौं – नेपाली बजारमा हुन्डाइको इलेक्ट्रिक कार कोना फेसलिफ्ट भित्रिएको छ । नेपालका लागि आधिकारिक वितरक लक्ष्मी इन्टरकन्टिनेन्टल प्रालिले पहिलेको मोडल भन्दा ३ लाख बढी मूल्यका साथ नयाँ कोना बिक्री–वितरण हुने बताएको छ । औपचारिक लन्च भने केही दिनमा हुनेछ ।

हाल नेपाली बजारमा बिक्री भइरहेको हुन्डाई कोनाको मूल्य ५६ लाख ९६ हजार रुपैयाँ छ । नयाँ कोनाको मूल्य ५९ लाख ९६ हजार रुपैयाँ तोकिएको छ ।

हुन्डाईले १०० किलोवाट मोटर र ३९.२ किलोवाट आवर क्षमताको ब्याट्री अप्सन भएको कोना फेसलिफ्ट नेपाली बजारमा उपलब्ध गराएको हो । यसले सिंगल चार्जमा ३१२ किलोमिटरको रेन्ज दिन्छ ।

अन्तर्राष्ट्रिय बजारमा पहिले नै लन्च गरिएको कोना फेसलिफ्टमा पहिलेको मोडल भन्दा सामान्य परिमार्जन गरिएको छ । यसको अगाडिको ग्रिल प्यानल परिवर्तन गरिएको छ भने हेडल्याम्प फरक देख्न सकिन्छ।

फरक किसिमको मसिनो एलइडी डे टाइम रनिङ लाइट र पछाडिको लाइटमा पनि परिवर्तन देख्न सकिन्छ । अघिल्लो भागमा ट्रायो एलईडी हेडल्याम्प छ ।

हाल ७ इन्चको इन्फोटेन्मेन्ट सिस्टम रहेकोमा नयाँ गाडीमा ८ इन्चको बनाइएको छ भने डिजिटल इन्स्ट्रयुमेन्ट क्लस्टर रहेको छ । त्यसैगरी यसमा सनरुफको सुविधा समेत थप भएर आएको छ ।