८० लाखदेखि १ करोड ४० लाख रेन्जमा हुन्डाई टुसान र जिप कम्पासबीच कडा टक्कर

बिलासी र महंगो एसयूभी चाहनेहरुका लागि नेपाली बजारमा थुप्रै ब्रान्डका यस्ता एसयूभी उपलब्ध छन् । बजारमा अहिले ४ करोड हाराहारी मूल्य पर्ने बिएमडब्लु र टोयोटाका एसयूभी समेत कारोबार भैरहेको छ । यस्ता एसयूभीको पहुँच केही व्यक्तिमा मात्र सीमित हुने हुँदा सामन्यतया १ करोड मूल्य हाराहारीका एसयूभीको चर्चा बढी हुने गरेको पाइन्छ ।

नेपाली बजारमा ८० लाखदेखि १ करोड ५० लाख मूल्य बीचमा स्तरिय एसयूभी खरिद गर्न सकिन्छ । यो मूल्य रेन्जमा बिभिन्न ब्रान्डका यस्ता एसयूभी उपलब्ध हुँदै आएपनि बजारमा चर्चा भने जिप कम्पास र हुन्डाई टुसानको बढी मात्रामा हुने गरेको छ । अमेरिकन अटो निर्माता जिप र कोरियन ब्रान्ड हुन्डाईबीच यो मूल्य रेन्जमा प्रतिस्पर्धा समेत उच्च हुँदै गएको छ ।

जिपको नेपालका लागि आधिकारिक बितरक लाइफ अटोमोबाइलले २ महिना अघि सार्बजनिक गरेको न्यू कम्पास हालसम्म ४ दर्जन हाराहारीमा बिक्री भैसकेको छ भने १० दिनअघिमात्र भित्रिएको नयाँ टुसानको माग समेत उच्च रहँदै आएको छ । पहिलो चरणमा भित्रिएका नयाँ टुसानको सम्पूर्ण युनिट बिक्री भैसकेको र नयाँ अर्डर आउने क्रममा रहेको कम्पनी स्रोतले बताएको छ ।

बेस र टप भेरिएन्टको मूल्य समेत करिब करिब समान
जिपको नयाँ कम्पास भारतीय बजारमा उत्पादन भई नेपाल आयात हुँदै आइरहेको छ भने हुन्डाईको नयाँ टुसान सिधै कोरियाबाट आयात भैरहेको छ । कम्पास १४ सय क्षमतामा पेट्रोल र २ हजार सीसी क्षमतामा डिजेल इन्जिनमा उपलब्ध छ । त्यसैगरी टुसानको ४ वटै भेरिएन्ट २ हजार सीसी क्षमता पेट्रोल र डिजेल दुबै इन्जिन अप्सनमा उपलब्ध रहँदै आएको छ ।

कम्पासको बेस भेरिएन्ट स्पोर्टको मूल्य नेपाली बजारमा ८४ लाख ९० हजार रुपैयाँ निर्धारण गरिएको छ भने टुसानको बेस भेरिएन्ट जीएल टु ह्विल ड्राइभ म्यानुअल ट्रान्समिसनको मूल्य ८९ लाख ९६ हजार रुपैयाँ पर्छ । त्यसैगरी कम्पासको १४ सय सीसी क्षमताको लिमिटेड एडिसनको मूल्य नेपाली बजारमा १ करोड ११ लाख ९० हजार रुपैयाँ तोकिएको छ ।

त्यसैगरी २ हजार सीसी क्षमताको कम्पास अटोमेटिकको मूल्य १ करोड ९ लाख ९० हजार, एस मोडलको अटोमेटिक भेरिएन्टको १ करोड १८ लाख ९० हजार, कम्पास अटोमेटिक फोर बाई फोर भेरिएन्टको मूल्य १ करोड २७ लाख ९० हजार र सबैभन्दा महंगो एस मोडल फोर बाई फोर अटोमेटिक भेरिएन्टको १ करोड ३६ लाख ९० हजार रुपैयाँ तोकिएको छ ।

उता टुसान जीएलएस टु ह्विल ड्राइभ अटोमेटिकको १ करोड ७ लाख ९६ हजार र १ करोड १४ लाख ९६ हजार रुपैयाँ निर्धारण गरिएको छ भने सबैभन्दा महंगो भेरिएन्ट जीएलएक्स फोर ह्विल ड्राइभ अटोमेटिक ट्रान्समिसनको मूल्य १ करोड ३४ लाख ९६ हजार रुपैयाँ तोकिएको छ । टुसानको टप भेरिएन्टको एसयूभी भने डिजेल इन्जिनमा उपलब्ध छ ।