भारतमा हुन्डाई क्रेटाको १० वर्ष पुरा, बिक्रीमा सधैं अब्बल

हुन्डाई मोटर्स इन्डियाको सबैभन्दा सफल मोडल क्रेटा भारतमा उत्पादन हुन थालेको १० वर्ष पुरा भएको छ । जुलाई २०१५ मा लन्च भएदेखि नै यो मिडसाइज एसयूभीले भारतीय र नेपाली ग्राहकको विश्वास जित्दै आएको छ ।

हुन्डाईका अनुसार १० वर्षको यस अवधीमा १२ लाखभन्दा बढी क्रेटा बिक्री भइसकेको छ । लन्च भएदेखि नै बिक्रीमा अब्बल सावित यस एसयूभीले भारतमा सबैभन्दा धेरै बिक्री हुने मिडसाइज एसयूभीको पहिचान कायमै राखेको छ ।

भारतको मिड साइज एसयूभी सेग्मेन्टमा क्रेटा एउटै मोडलले ३१ प्रतिशत भन्दा बढी बजार हिस्सासहित बजारमा आफ्नो प्रभुत्व जमाएको छ । यस वर्षको ६ महिनामा मात्रै क्रेटाले ३ महिनासम्म भारतमा सबैभन्दा धेरै बिक्री हुने एसयूभीको पहिचान कायम गरेको छ । पछिल्लो समय क्रेटाको कुल बिक्रीमा ७० प्रतिशत हिस्सा सनरुफ भेरिएन्टले ओगटेको छ ।

सन् २०१६ मा हुन्डाईले ९२ हजार ९२६ युनिट क्रेटा बिक्री गरेकोमा यो संख्या २०२४ मा बढेर १ लाख ८६ हजार ९१९ युनिट पुगेको छ । भारतमा निर्मित क्रेटा १३ भन्दा बढी देशहरूमा निर्यात हुँदै आएको छ । हुन्डाईले हालसम्म २ लाख ८७ हजार बढी क्रेटा निर्यात गरिसकेको छ ।

हुन्डाइले हालै यसको ईभी भर्सन समेत लन्च गरेको छ । हुन्डाई क्रेटा १.५ लिटर ४ सिलिण्डर पेट्रोल र १.५ लिटर पेट्रोल तथा डिजेल टर्बो इन्जिनमा उपलब्ध छ । त्यस्तै इलेक्ट्रीक क्रेटामा ९९ र १२६ किलोवाटको मोटर पाउन सकिन्छ भने ब्याट्री प्याक ४२ र ५१.४ किलोवाट आवर अप्सनमा उपलब्ध छ ।

९ वर्षमा नेपालमा १० हजार यूनिट बिक्री
क्रेटा नेपाल आएको ९ वर्ष पुरा भएको छ । सन् २०१६ देखि नेपाली बजारमा बिक्री हुँदै आएको क्रेटा हालसम्म १० हजार भन्दा बढि यूनिट बिक्री भैसकेको छ । यो नेपाली एसयूभी पारखीको पहिलो रोजाइमा पर्दै आएको छ ।

क्रेटालाई गत वर्षको चैतदेखी नेपालमै एसेम्वल गरी बिक्री गर्न थालिएको छ । नेपालमै एसेम्वल हुन थालेपछि यसको मूल्य समेत ९ लाख रुपैयाँसम्मले घटेको छ । साथै, यसको इलेक्ट्रिक भर्सनले समेत अहिले बजारमा राम्रै चर्चा पाइरहेको छ ।

नेपाली बजारमा क्रेटा आइसिईको ६ वटा भेरिएन्ट उत्पादन भइरहेको छ । जसको सुरुवाती मूल्य ५३ लाख ९६ हजार रुपैयाँ निर्धारण गरिएको छ भने टप स्पेकलाई ७८ लाख ९६ हजार रुपैयाँ पर्छ ।

त्यसैगरी, ४२ किलोवाट आवर भेरिएन्टमा मात्रै उपलब्ध यसको ईभी भर्सन समेत ४ वटा भेरिएन्टमा उपलब्ध छ । जसको मूल्य ५१ लाख ९६ हजारदेखी ५९ लाख ९६ हजार रुपैयाँसम्म निर्धारण गरिएको छ ।