जुलाईमा हुन्डाईको ऐतिहासिक फड्को, क्रेटा र आई२० को कीर्तिमानी व्यापार

काठमाडौं–हुन्डाई मोटर इन्डियाले जुलाई २०२६ मा आफ्नो अहिलेसम्मकै उत्कृष्ट मासिक बिक्री नतिजा हात पारेको छ । कम्पनीले गत महिना ७५ हजार ३६० वटा सवारी साधन बिक्री गरेको हो ।

हुन्डाईको इतिहासमा पहिलोपटक मासिक बिक्री ७५ हजार युनिट नाघेको यो पहिलोपटक हो, जसले गत वर्षको जुलाईमा भएको ६० हजार ७३ युनिटको तुलनामा २५.४५ प्रतिशतको वार्षिक वृद्धि दर्ता गरेको छ ।

आन्तरिक बजारमा कम्पनीले ५४ हजार २१० युनिट कार बिक्री गरेर गत वर्षको सोही महिनाको ४३ हजार ९७३ युनिटको तुलनामा २३.२८ प्रतिशतको वृद्धि हासिल गरेको छ । अघिल्लो महिना जुन २०२६ मा एक आपूर्तिकर्ताको कारखानामा लागेको आगोका कारण उत्पादन प्रभावित भई ३९ हजार ६३५ युनिटमा सीमित भएको बिक्री जुलाईमा ३६.७७ प्रतिशतले बढेर पुनः सामान्य अवस्थामा फर्किएको हो ।

यस महिना क्रेटा एसयूभी १८ हजार ८८ युनिट बिक्री भई क्यालेन्डर वर्ष २०२६ को उच्च मासिक रेकर्डमा पर्न सफल भयो भने प्रिमियम ह्याचब्याक आई२० ले पनि ६ हजार ७३८ युनिट बिक्री गर्दै यस वर्षको उत्कृष्ट प्रदर्शन ग¥यो ।

कम्पनीका लागि निर्यात वृद्धि पनि अर्को महत्वपूर्ण आधार बनेको छ । जुलाई २०२६ मा हुन्डाईले २१ हजार १५० युनिट कार विदेश पठाएको छ, जुन गत वर्षको १६ हजार १०० युनिटभन्दा ३१.३७ प्रतिशतले बढी हो ।

कम्पनीका अनुसार, यो १०० महिनायताकै उच्च मासिक निर्यात परिमाण हो, जसले भारतलाई विश्वव्यापी उत्पादन तथा निर्यात केन्द्रका रूपमा स्थापित गरेको छ । हुन्डाई मोटर इन्डियाका प्रबन्ध निर्देशक तथा सीईओ तरुण गर्गका अनुसार, कुल बिक्री र निर्यातको यो नतिजाले ग्राहकको विश्वास र ‘मेक इन इन्डिया, मेड फर द वल्र्ड’ रणनीतिलाई बलियो बनाएको छ ।

आगामी दिनमा कम्पनीले बजारमा आफ्नो पकड अझ बलियो बनाउन बायोनमा आधारित नयाँ मिड–साइज एसयूभी, टाटा नेक्सन ईभीसँग प्रतिस्पर्धा गर्ने सब–४ मिटर इलेक्ट्रिक एसयूभी र नयाँ प्रविधिसहितको नेक्स्ट–जेनेरेसन क्रेटा सार्वजनिक गर्ने तयारी गरिरहेको छ ।