पहिरो र लेदोले मुग्लिन–नारायणगढ सडक प्रभावित, पन्छाउने काम जारी

निरन्तरको वर्षाका कारण मुग्लिन–नारायणगढ सडक खण्डका विभिन्न स्थानमा पहिरो, ढुङ्गा र लेदो खस्दा सडक एकतर्फी रूपमा मात्र सञ्चालन भइरहेको छ ।

सडक डिभिजन कार्यालय भरतपुरका अनुसार सोमबार बिहान उक्त सडक खण्ड अन्तर्गत तुईन खोला पुल, नाम्सि खोलाको नयाँ पुल र सिमलताल क्षेत्रमा पहिरो खसेका कारण यातायात प्रभावित भएको हो । तुईन खोला र नाम्सि खोलाको नयाँ पुल नजिकै माथिबाट ढुङ्गा खसेको छ भने सिमलतालमा लेदो बगेर सडकमा आएपछि आवतजावत एकतर्फी बनेको छ ।

अवरुद्ध सडकलाई पूर्ण रूपमा सुचारु गराउन सडक डिभिजनका हेभी इक्विपमेन्टहरू परिचालन गरी पहिरो तथा लेदो पन्छाउने काम निरन्तर भइरहेको छ । थप पहिरो नझरेमा केही समयभित्रै सडक दुईतर्फी सञ्चालनमा ल्याउने गरी काम भइरहेको जनाइएको छ ।

सो क्षेत्रमा अझै पानी परिरहेकाले र थप पहिरो खस्ने जोखिम कायमै रहेकाले सडक डिभिजन भरतपुरले सवारी चालक तथा यात्रुहरूलाई सडकको अद्यावधिक अवस्था बुझेर मात्र सुरक्षित यात्रा गर्न अनुरोध गरेको छ ।