यस्तो छ नेपाल आउने तयारीमा रहेको ग्रेटवाल मोटर्सको विंगल५ पिकअप

चाइजिन अटो मेकर ग्रेटवालको नयाँ पिकअप विंगल५ नेपाल आउने भएको छ । नेपालका लागि आधिकारिक बितरक भीजी इम्पेक्स स्रोतले अबको केही समयपछि यो पिकअपलाई नेपाल भित्राउने बताएको छ । बजारमा अहिले पिकअप ट्रकको माग उच्च रहेका कारण उसले पोअरपछि अर्को नयाँ पिकअप विंगल५ थप गर्न लागेको हो ।

एक दशक अघि तत्कालिन बिक्रेताले नेपाल भित्राएर राम्रै संख्यामा बिक्री गरेको यो पिकअप अहिले पनि सडकमा गुडिरहेको देख्न सकिन्छ । नयाँ बिक्रेताका रुपमा कारोबार थालेपछि भीजी इम्पेक्सले पुन भित्राउने तयारी थालेको विंगल५ अन्तराष्ट्रिय बजारमा डबल र सिंगल क्याब भेरियन्टमा उपलब्ध रहँदै आएको छ । नेपालमा यी दुबै भेरियन्ट भित्रिनसक्ने कम्पनी स्रोतको भनाई छ । नेपाल आउन लागेको यो पिकअप २०१९ मोडलको हो । जुन युरो ४ स्टान्डर्डमा उपलब्ध हुनेछ ।

विंगल५ मा २.४ लिटर इनलाईन मित्सुबिसी इन्जिन जडान गरिएको छ । जसको अधिकतम पावर १३४ एचपी र टर्क २०५ एनएम रहेको छ । टु ह्विल ड्राइभ सहितको ५ स्पिड म्यानुअल ट्रान्समिसन दिइइको यो पिकअप इन्धन किफायती र उच्चतम पर्फमेन्सका लागी उपयुक्त रहने दाबी गरिएको छ ।

यो पिकअपमा फराकिलो कार्गो स्पेस, म्यानुअल एयर किन्डसनिङ, मल्टि कलर स्टेरिङ ह्विल, युएसबी सहितको फोर स्पिकर अडियो सिस्टम, इबिडी सहितको एबिएस, डुअल एयरब्याग, टायर प्रेसर मोनिटरिङ सिस्टम र स्पिड सेन्सर भएको सेन्टर डोर लक लगायत अन्य थुप्रै फिचर्स उपलब्ध हुनेछन् । नेपाल आउँदा यसको मूल्य कतिपर्छ भन्ने बिषयमा कम्पनीले कुनै जानकारी उपलब्ध गराएको छैन ।