२०२६ इसुजु भी–क्रस भारतमा लन्च, अब सबै भेरिएन्टमा फोर ह्विल ड्राइभ सिस्टम अनिवार्य

इसुजु मोटर्सले आफ्नो लोकप्रिय पिकअप ट्रक २०२६ इसुजु भी–क्रस भारतीय बजारमा लन्च गरेको छ। नयाँ मोडलको मूल्य करिब २५ लाख भारुभन्दा माथिबाट सुरु हुने बताइएको छ ।

यसमा सबैभन्दा ठुलो परिवर्तन भनेको सबै भेरिएन्टमा फोर ह्विल ड्राइभ सिस्टमलाई स्ट्यान्डर्ड रुपमा उपलब्ध गराइएको छ । यसअघि उपलब्ध टु ह्विल ड्राइभ भेरिएन्ट पूर्ण रूपमा बन्द गरिएको छ। कम्पनीका अनुसार नयाँ मोडल भी–क्रसलाई अफरोड र लाइफस्टाइल पिकअप प्रयोगका लागि उपयुक्त सवारीका रूपमा स्थापित गर्नु हो । भारतीय बजारमा यसले टोयोटाको पिकअप रेन्जसँग प्रतिस्पर्धा गर्ने अपेक्षा गरिएको छ।

यसको बाहिरी डिजाइनमा पनि परिमार्जन गरिएको छ। नयाँ भी–क्रसमा फ्रन्टको बम्पर डिजाइन परिमार्जित गरेको छ र पहिलेको तुलनामा बडी क्ल्याडिङ घटाइएको छ। यसमा एलइडी प्रोजेक्टर हेडलाइट र फगलाइट पहिले जस्तै राखिएको छ भने अघिल्लो मोडलमा रहेको स्किड प्लेट हटाइएको छ । नयाँ १८ इन्चका अलोय ह्विल जडान गरिएको छ र साइड ह्विल आर्च तथा ब्ल्याक क्ल्याडिङ हटाएर बडी प्रोफाइललाई सफा र प्रिमियम लुक दिइएको छ।

यसमा १०.३ इन्चको फ्लोटिङ टचस्क्रिन, ३६० डिग्री क्यामेरा, ८ स्पिकर अडियो सिस्टम, टायर प्रेसर मनिटरिङ सिस्टम, ६ वटा एयरब्याग, स्टेबिलिटी कन्ट्रोल, ट्रयाक्सन कन्ट्रोल र हिल डिसेन्ट असिस्ट जस्ता फिचर समावेश गरिएको छ।

यद्यपि इन्जिनमा भने कुनै परिवर्तन गरिएको छैन । यसमा पहिलेको जस्तै १.९ लिटर, चार सिलिन्डर टर्बो डिजेल इन्जिन उपलब्ध छ, जसले १६१ बीएचपी पावर र ३६० एनएमको टर्क उत्पादन गर्छ । सो इन्जिन ६ स्पिड म्यानुअल वा अटोमेटिक गियरबक्ससँग उपलब्ध छ ।