एसयूभीको डिजाइन प्याटेन्ट दर्ता र कर्मचारी माग गरेर फोर्डले देखायो छिट्टै भारत फर्कने संकेत

फोर्डले भारतमा कार निर्माणलाई छिट्टै निरन्तरता दिने संकेत देखाएको छ । २ वर्षअघि भारत छाडेको अमेरिकन अटो निर्माताले हालै भारतमा एन्डेभर एसयूभीको डिजाइन प्याटेन्ट दर्ता गरेर यस्तो संकेत देखाएको हो । साथै कम्पनीले उत्पादन प्रक्रियासंग जोडिने केही पदमा कर्मचारी समेत माग गरेको छ ।

फोर्डले यसअघि नै लगभग टुंगिसकेको चेन्नाई प्लान्टको बिक्री डिललाई अन्तिम समयमा आएर रद्ध गरेको थियो । सो डिल रद्ध भएपछि कम्पनीले भारतमा पुनः आफ्नो उत्पादन शुरु गर्न लागेको अनुमान भइरहेको समयमा नयाँ एसयूभीको डिजाइन प्याटेन्ट नै दर्ता हुँदा फोर्ड छिट्टै भारतमा फर्कन चाहेको संकेतलाई थप प्रमाण मिलेको छ ।

नयाँ डिजाइन प्याटेन्ट दर्ता भएपनि एन्डेभर यसअघि भरतमा उपलब्ध रहँदै आएको थियो । नेपालमा अहिले सो एसयूभी एभरेष्ट नामले आयत हुँदै आएको छ । नेपालका लागि आधिकारिक वितरक जिओ अटोमोबाइल्सले थाइल्यान्डमा उत्पादन भएको एभरेष्टलाई आयत गरी बिक्री गर्दै आएको हो । यसअघि भारतमा एसेम्वल हुँदा सो एसयुभी एन्डेभरकै नामले नेपाल आएको थियो ।