गाडीका पार्टपुर्जाको अवैध कारोबार रोक्न माग गर्दै बुझाइयो ज्ञापनपत्र

काठमाडौं – नेपाल भारत खुला सिमानाको फाइदा उठाउँदै पछिल्लो समय गाडीका पार्टपुर्जाको अवैध ओसारपसार बढिरहेको र यसलाई रोक्न माग गर्दै प्रशासनलाई ज्ञापनपत्र बुझाइएको छ ।

अवैध कारोबारका कारण राष्ट्रले नोक्सानी भोग्नुपरेको भन्दै नेपाल अटो मेकानिक्स व्यवसायी महासंघ र बुटवल अटो इन्जिनियरिङ एसोसिएसनले जिल्ला प्रशासन कार्यालय रूपन्देहीमा संयुक्त रूपमा ज्ञापनपत्र बुझाएका हुन् ।

कर तिरेर वैध कारोबार गर्दै आएका व्यवसायीहरु यसरी अवैध कारोबार बढ्दै गए पछि मर्कामा परेको बताइएको छ । व्यवसायी र राज्य दुवै पक्ष मारमा परेकाले साझा समस्याको रूपमा लिई सरोकारवाला निकाय, संघसंस्था, भन्सार विभाग तथा प्रहरी प्रशासनको संयुक्त पहलमा अवैध कारोबार निरुत्साहित गर्ने र अवैध कारोबारीलाई कारबाहीको दायरामा ल्याउनुपर्ने माग गरिएको छ ।

‘अवैध कारोबार बढ्दा राज्यले राजस्व गुमाइरहेको छ । कोभिड–१९ र चर्को ब्याजले व्यवसाय धान्नै मुश्किल भएको अवस्थामा पुगेका व्यवसायीले अवैध कारोबारका कारण झनै सास्ती भोग्नुपरेको छ,’ बुटवल अटो इन्जिनियरिङ एसोसिएसनद्वारा जारी विज्ञप्तिमा भनिएको छ ।