बेनेलीले ल्यायो आर्टिफिसियल एक्जस्ट साउन्ड जेनेरेटर सहितको इलेक्ट्रिक स्कुटर डोङ

धेरै प्रतिष्ठित बाइक निर्माता कम्पनीहरु इलेक्ट्रिक स्कुटर उत्पादनमा लागेका छन् । यो अवस्थामा बेनेली समेत पछि पर्ने कुरै भएन । यही कुरालाई मनन गरेर हुन सक्छ, बेनेलीले इन्डोनेसियामा फरक डिजाइनको डोङ नामक इलेक्ट्रिक स्कुटर सार्वजनिक गरेको छ ।

इन्ट्री लेवलका इलेक्ट्रिक स्कुटर बजारमा बाजी मार्ने लक्ष्यका साथ प्रवेश गरेको बेनेली डोङको डिजाइन युनिक छ । यसको पछिल्लो भाग हेर्दा यसमा केही झुन्डिरहेको जस्तो पनि लाग्छ । यसको स्प्लिट र एरोडाइनामिक डिजाइनले अन्य भन्दा फरक देखाएको छ ।

स्कुटरको पछिल्लो भागमा मोटर, ब्याट्री र सिटलाई उपयुक्त तरिकाले मिलाएर राख्नका लागि सिलिन्ड्रिकर आकार दिइएको छ । यसमा भएको १.५६ किलोवाट आवरको लिथियम आयोन ब्याट्रीले ६० किलोमिटरको रेन्ज दिन्छ । यसमा फुल एलईडी लाइटिङ र एलसीडी ड्यासबोर्ड स्ट्यान्डर्डको रुपमा उपलब्ध छ ।

बेनेलीले डोङ इलेक्ट्रिक स्कुटरलाई छोटो दुरी र सहरी यात्राका लागि ल्याएको अनुमान लगाउन सकिन्छ । यसमा भएको १.२ किलोवाटको इलेक्ट्रिक मोटरले १.६ एचपी बराबरको पावर दिन्छ । यसका आधारमा यसको टप स्पिड ४५ किलोमिटर प्रतिघण्टा हुन सक्छ ।

यद्यपि बेनेली डोङ इलेक्ट्रिक स्कुटरको सबैभन्दा सबल फिचर भनेको यसको साउन्ड हो । स्कुटरमा प्रयोग गरिएको आर्टिफिसियल एक्जस्ट साउन्ड जेनेरेटरका कारण यसको साउन्ड सामान्य स्कुटरको जस्तो लाग्छ ।

इन्डोनेसियामा यो स्कुटरको मूल्य २ हजार ५ सय डलर तोकिएको छ ।