एसयू७ ईभी पछि अब स्मार्टफोन निर्माता शाओमीले एसयू७ अल्ट्रा हाइपरकार ल्याउने

स्मार्टफोन निर्माता शाओमीले आफ्नो पहिलो इलेक्ट्रिक कार एसयू७ सार्वजनिक गरिसकेको छ । अब कम्पनीले ट्रयाक केन्द्रित ईभी एसयू७ अल्ट्रा पनि ल्याएको छ । सो इलेक्ट्रिक कारमा डिजाइन, एरोडायनामिक्स र परफर्मेन्ससहित स्ट्यान्डर्ड एसयू७ को तुलनामा धेरै अपडेट गरेको छ ।

कम्पनीले शाओमी ईभी एसयू७ अल्ट्रालाई सबैभन्दा छिटो ४ डोर इलेक्ट्रिक कार बनाउने लक्ष्य राखेको छ । कम्पनीले सो हाइपरकारलाई न्युरबर्गिङ ट्रयाकमा लैजाने योजना बनाएको छ । यसमा ३ वटा विद्युतीय मोटरबाट अत्यधिक हाइपरकार परफर्मेन्सको दाबो गरिएको छ । सो कार १ दशमलव ९७ सेकेण्डमा १०० किलोमिटर प्रतिघण्टाको गतिमा पुग्ने कम्पनीको दाबी छ । यसको टप स्पिड ३५० किलोमिटर प्रति घण्टा हुनेछ ।

यसमा ब्रेकिङ सिस्टमको लागि ०.६जी रिजेनेरेटिभ ब्रेकिङ र २.३६जी फिजिकल ब्रेक जस्ता फिचर उपलब्ध गराइएको छ, जसका कारण सो कार १०० किलोमिटर प्रतिघण्टाको गतिबाट २५ मिटरमा रोकिन्छ । सो कार यसको सेगमेन्टमा आउने अन्य कारभन्दा हल्का हुनेछ ।

कम्पनीले आफ्नो नयाँ इलेक्ट्रिक कारको ब्याट्री प्याकको बारेमा कुनै जानकारी दिएको छैन तर यसमा सीएटीएलको नयाँ क्युलिन आईआई प्रयोग गरिएको छ, जुन १२ मिनेटमा ० देखि १०० प्रतिशतसम्म चार्ज हुन सक्छ । यसले २० प्रतिशत एसओसीमा पनि १ हजार ७२ एचपी भन्दा बढी पावर दिन सक्ने कम्पनीको दाबी छ ।