बिरालोका लागि बीवाईडीको फ्ल्यास चार्जर बेड, बजारमा आउनासाथ सोल्ड आउट

काठमाडौं–बीवाईडीले आफ्नो फ्ल्यास चार्जर नेटवर्कको डिजाइनमा बिरालो सुत्ने बेड बजारमा ल्याएको छ । मात्र १३ अमेरिकी डलर पर्ने यो बेड सार्वजनिक भएलगत्तै तुरुन्तै बिक्री भएको छ ।

बीवाईडीले हालै चीनभर आफ्नो मेगावाट क्षमताको फ्ल्यास चार्जिङ स्टेसनहरू विस्तार गरिरहेको छ र यसैको डिजाइनबाट प्रेरित भएर बिरालोका लागि यो आकर्षक बेड तयार पारिएको हो ।

यस बेडको बाहिरी भाग टी आकारको र सियन तथा कालो रङको संयोजनमा छ जसमा फ्ल्यास चार्जिङको लोगो र दुईवटा साना नरम बलहरू झुन्ड्याइएका छन्, जसले चार्जरको केबल जस्तै रूप दिन्छ ।

कम्पनीले यस बेडले बिरालाहरूलाई छिटो र आरामदायी निद्रा प्रदान गर्ने ठट्टा गर्दै छोटो समयमा नै गाढा निद्रामा पठाउन सहयोग गर्ने बताएको छ । पोलिस्टर र कृत्रिम खरायोको रौं जस्तो नरम सामग्रीबाट बनेको यो खाट करिब ७.५ किलोग्राम तौलसम्मका पाल्तु जनावरहरूका लागि उपयुक्त मानिएको छ ।

सेप्टेम्बरको अन्त्यतिर फ्याङ चेङ बाओ एपको स्टोरमार्फत प्रि–सेलमा राखिएको यो उत्पादन निकै लोकप्रिय बनेको छ र केही डिलरहरूले यसलाई गाडी खरिद गर्दा उपहारको रूपमा समेत दिने घोषणा गरेका छन् ।