नयाँ बसपार्कमा नेटवर्क गुणस्तर कायम राख्न नेपाल टेलिकमको बीटीएस भ्यान

काठमाडौं - दसैँको यात्रामा समेत नेटवर्क साथमा राखी आफन्तसँग निरन्तर सम्पर्क कायम गर्न सहज होस् भन्ने उद्देश्यले नेपाल टेलिकमले नयाँ बसपार्कमा बीटीएस भ्यान राखेको छ ।

दसैँमा घर जाने यात्रुहरूको चाप र सुविधालाई मध्यनजर गर्दै नेपाल टेलिकमले नयाँ बसपार्क क्षेत्रमा टुजी र फोरजी नेटवर्क सहित बीटीएस भ्यान सञ्चालनमा ल्याएको बताएको छ ।

यसबाट यात्राका क्रममा नेटवर्कमा हुन सक्ने असहजतालाई व्यवस्थापन गर्न र यात्रुहरूलाई आफ्ना परिवार तथा आफन्तजनसँग सहज रूपमा सम्पर्कमा रहन सहयोग पुग्ने अपेक्षा गरिएको कम्पनीको भनाइ छ।

नयाँ बसपार्क क्षेत्रमा घर जाने यात्रुहरुको चाप हुने र सो अवस्थामा नेटवर्कमा समस्या भएमा यसको समाधानका लागि बीटीएस भ्यानले सहयोग पुग्ने कम्पनीको भनाइ छ ।

बीटीएस भ्यानमा नेटवर्क सुचारु गर्नका लागि आवश्यक उपकरण राखिएको हुन्छ । यसबाट धेरै मानिसहरु भएको स्थानमा फोन गर्न र डाटा चलाउन सहज हुन्छ ।