दसैँका लागि बस टिकट काट्न काउन्टरमै पुग्नुपर्दैन, यी हुन् अनलाइन बुकिङका विकल्प

काठमाडौं - दसैँ नजिकिएसँगै मध्यम तथा लामो दूरीका सार्वजनिक यातायातको अग्रिम टिकट बुकिङ खुला भएको छ। टिकट बुकिङ सुरु भएसँगै काठमाडौंको नयाँ बसपार्क, कलंकी, कोटेश्वरलगायतका स्थानमा रहेका टिकट काउन्टरमा यात्रुको भीड बढ्न थालेको छ। तर, काउन्टरमा घण्टौँ लाइन बस्नुपर्ने बाध्यता हटाउन यात्रुले घरमै बसेर अनलाइनबाटै बसको टिकट काट्न सक्ने विकल्प पनि उपलब्ध छन्।

नेपालमा सञ्चालनमा रहेका डिजिटल वालेट तथा अनलाइन टिकट बुकिङ प्लेटफर्ममार्फत यात्रुले आफ्नो गन्तव्य, यात्रा मिति, बजेट र सुविधाअनुसार बस छनोट गरी सिट सुरक्षित गर्न सक्छन्। यसका लागि नयाँ एप डाउनलोड गर्नैपर्ने अवस्था छैन। नियमित प्रयोग गर्दै आएका डिजिटल वालेट वा सम्बन्धित कम्पनीको वेबसाइटबाटै टिकट बुकिङ गर्न सकिन्छ।

इसेवा र खल्तीबाटै बस टिकट

डिजिटल वालेट प्रयोग गर्ने यात्रुका लागि इसेवा र खल्तीबाटै बस टिकट काट्ने सुविधा उपलब्ध छ। यी एपमार्फत यात्राको विवरण भरेपछि उपलब्ध बस, प्रस्थान समय, भाडादर र खाली सिटको जानकारी हेरेर आफूलाई उपयुक्त विकल्प छनोट गर्न सकिन्छ।

इसेवाबाट टिकट काट्न एपको होम स्क्रिनमा रहेको ‘ट्राभल्स एन्ड टिकटिङ’ विकल्पमा गएर ‘बस टिकट्स’ छनोट गर्नुपर्छ। त्यसपछि प्रस्थान गर्ने स्थान, गन्तव्य र यात्राको मिति राखेपछि उपलब्ध बसको सूची देखिन्छ। सूचीबाट बस, छुट्ने समय र सिट छनोट गरी इसेवाबाटै भुक्तानी गर्न सकिन्छ।

त्यसैगरी, खल्ती प्रयोगकर्ताले एपको होम स्क्रिनमा रहेको ‘पेमेन्ट सर्भिसेस’ अन्तर्गत ‘बस टिकट’ विकल्प छनोट गर्नुपर्छ। प्रस्थान स्थान, गन्तव्य र यात्रा मिति राखेपछि उपलब्ध बसको विवरण हेरेर सिट सुरक्षित गर्न सकिन्छ।

बससेवा, ट्रिप टर्बो र गोमाईगोबाट पनि बुकिङ

डिजिटल वालेटबाहेक अनलाइन बस टिकट बुकिङका लागि छुट्टै प्लेटफर्म पनि उपलब्ध छन्। बससेवा (bussewa.com.np) र ट्रिप टर्बो (tripturbo.com/bus) जस्ता प्लेटफर्मबाट विभिन्न गन्तव्यमा सञ्चालन हुने बसको टिकट बुक गर्न सकिन्छ। उपलब्ध विवरणअनुसार यी सेवाले देशका ७३ जिल्लासम्म आफ्नो पहुँच विस्तार गरेका छन्।

त्यस्तै, गोमाईगो (gomygo.com) ले मधेश प्रदेश तथा पूर्वी नेपालका जिल्लालाई प्राथमिकतामा राखेर सेवा दिँदै आएको छ। धनगढीलगायत प्रमुख सहरलाई समेत लक्षित गरेको यस प्लेटफर्ममा मुख्यतः लक्जरी तथा सुविधासम्पन्न बसका विकल्प उपलब्ध रहेको जनाइएको छ।

यी प्लेटफर्ममा यात्रुले दिवा वा रात्रि सेवा, सामान्य वा डिलक्स बस तथा एसी वा नन–एसीका विकल्प तुलना गर्न सक्छन्। भाडादर र उपलब्ध सुविधाका आधारमा आफूलाई उपयुक्त बस छनोट गर्न सकिने भएकाले यात्राको योजना बनाउन पनि सहज हुन्छ।

मोबाइल बैंकिङदेखि कार्डसम्मबाट भुक्तानी

अनलाइनबाट बस टिकट काट्दा डिजिटल वालेटमा मात्र निर्भर रहनुपर्दैन। उपलब्ध प्लेटफर्मअनुसार मोबाइल बैंकिङ, कनेक्ट आईपीएस तथा बैंक कार्डबाट समेत भुक्तानी गर्न सकिन्छ।

टिकट बुकिङ पूरा भएपछि मोबाइलमा प्राप्त हुने एसएमएस वा विद्युतीय टिकट सुरक्षित राख्नुपर्छ। यात्राका क्रममा आवश्यक पर्न सक्ने भएकाले टिकटमा उल्लेख गरिएको बसको विवरण, प्रस्थान समय र चढ्ने स्थान पनि राम्रोसँग जाँच गर्नु उपयुक्त हुन्छ।

यात्रा रद्द गर्नुपर्ने अवस्था आएमा रकम फिर्ताको व्यवस्था सम्बन्धित प्लेटफर्म र टिकटको सर्तअनुसार फरक हुन सक्छ। त्यसैले टिकट काट्नुअघि रद्द गर्ने प्रक्रिया, रिफन्डको नियम तथा लागू हुने शुल्कबारे जानकारी लिनु आवश्यक छ।

दसैँमा घर जाने यात्रुको चाप बढ्ने भएकाले आफूले रोजेको बस र सिट पाउन अग्रिम बुकिङ गर्नु उपयोगी हुन्छ। अनलाइनबाट टिकट काट्दा काउन्टरसम्म पुग्नुपर्ने समय र झन्झट कम हुनुका साथै विभिन्न बसको भाडा, प्रस्थान समय र सुविधाको तुलना गरेर यात्रा छनोट गर्न सकिन्छ।