डोङफेङ नामी र भिगो ईभीको बढ्यो मूल्य, नयाँ मूल्य कति ?

काठमाडौं - नेपालका लागि डोङफेङ नामी र भिगो ईभीको आधिकारिक वितरक एमएडब्लु वृद्धि मोटर्सले नेपालमा उपलब्ध दुवै मोडलका ईभीको मूल्यमा वृद्धि गरेको छ । बैशाख महिना देखि लागु हुने गरी सो मूल्य वृद्धि गरिएको हो ।

नयाँ मूल्य सूची अनुसार डोङफेङ नामी ०१ को ई३ मोडलको मूल्य ३६ लाख २५ हजार रुपैयाँ पुगेको छ । यो भन्दा पहिले यसको मूल्य ३४ लाख ७९ हजार रुपैयाँ थियो । यसको ड्युअल टोन र सिल्भर कलरको मूल्यका लागि भने थप ५० हजार रुपैयाँ बुझाउनु पर्छ ।

४९.५ किलोवाट मोटरमा उपलब्ध नामी ०१ नेपालमै पहिलो पटक सन् २०२४ को अगस्ट २२ मा सोल्टी होटलमा आयोजित एक भव्य कार्यक्रम बिच सार्वजनिक गरिएको थियो । त्यसपछि यसले नेपाली बजारमा राम्रो प्रदर्शन गरेको छ ।

अटो शो सुरु हुनुभन्दा केही दिनअघि सार्बजनिक गरिएको यो कार आकर्षक मूल्यका कारण चर्चामा छ । आकर्षक लुक्स, प्रिमियम फिचर र प्रतिस्पर्धी मूल्यका कारण यसलाई धेरैले ह्याचब्याक सेग्मेन्टमा गेम चेन्जर मोडलका रुपमा समेत लिने गरेका छन् ।

सार्वजनिक हुँदै गर्दा नामी ०१ बजारलाई चुनौती दिने उद्देश्यले आएको थियो र त्यसले आफ्नो वचन पूरा गरेको छ। यस सेग्मेन्टमै पहिलो पटक फ्रेमलेस डोर, फ्लस डोर ह्यान्डल, वेलकमिङ र मेमोरी सिट, अटो पार्किङ सुविधा र टेबलटप सहितको ड्रयर जस्ता विशेषताहरू ल्याएर नामी ०१ ले आइडियल ह्याचब्याकको परिभाषा नै नयाँ बनाएको थियो। साथै, १२.८ इन्चको उन्नत इन्फोटेनमेन्ट प्रणाली र अत्याधुनिक ड्राइभर असिस्टेन्स फिचरसहित यसले आफ्नो प्राइस रेन्जमा उत्कृष्ट स्टाइल, प्रविधि र प्रदर्शन पेश गरेको थियो। योसँगै नामीले छिटो बजार विस्तार गर्दै नेपालको बहुसंख्यक जनतालाई इलेक्ट्रिक मोबिलिटी सुलभ बनाएको छ।

त्यसपछि अर्को मोडलको रुपमा गत नामी भिगो सार्वजनिक गरिएको हो । नेपाली बजारमा उपलब्ध दुई मोडल नामी भिगो ई२ को मूल्य ४० लाख ९९ हजार र ई२ प्लसको मूल्य ४३ लाख ९९ हजार रुपैयाँ पुगेको छ । यो भन्दा पहिले सो ईभीको दुई भेरिएन्टको मूल्य क्रमशः ३८ लाख ९९ हजार र ४१ लाख ९९ हजार रुपैयाँ थियो ।

नामी भिगोको ‘म्याजिक कर्भ’ डिजाइनले आधुनिक सौन्दर्य र एरोडाइनामिक संरचनाको संयोजन प्रस्तुत गर्दै नामी ब्रान्डको नयाँ डिजाइन पहिचान विकास गरेको कम्पनीले जनाएको छ । यो मोडलमा रहेको ९९ किलोवाट मोटरले शहरदेखि राजमार्गसम्म शक्तिशाली एक्सेलेरेसन र स्मूथ ड्राइभिङ अनुभव प्रदान गर्छ ।

यसमा दुई ब्याट्री विकल्प उपलब्ध छन् । पहिलो ४४.९४ किलोवाट आवर क्षमताको ब्याट्री जसको डब्लुएलटीपी रेन्ज ३०० किलोमिटर छ, र दोस्रो ५१.८७ किलोवाट आवर ब्याट्री जसले ३५० किलोमिटरसम्मको रेन्ज प्रदान गर्छ । यसले १६७ किलोवाट फास्ट चार्जिङ सपोर्ट गर्दछ, जसले ब्याट्रीलाई ३० देखि ८० प्रतिशतसम्म केवल १८ मिनेटमै चार्ज गर्न सक्छ । कम्पनीका अनुसार यसले केही मिनेटमै करिब ११५ किलोमिटर दूरी थपिने सुविधा प्रदान गर्छ ।

गाडीको भित्री भाग अत्याधुनिक र आरामदायी बनाइएको छ । यसमा १२.८ इन्च टचस्क्रिन, भेन्टिलेटेड जिरो–प्रेसर सीटहरू, र पानोरेमिक मोनोरुफ जस्ता विशेषताहरू छन्, जसले चालक र यात्रु दुवैलाई प्रिमियम अनुभव दिन्छ ।

सुरक्षाका दृष्टिले पनि नामी भिगो उच्चस्तरको छ । यसमा जिरो फायर–एक्स्प्लोजन परीक्षण पार गरेको ब्याट्री सिस्टम, ६८.४ प्रतिशत उच्च–सामथ्र्यको स्टिल बडी र ६ वटा एअरब्यागहरूको संयोजन गरिएको छ, जसले गाडीलाई सुरक्षित र भरपर्दो बनाएको कम्पनीले जनाएको छ ।