बीवाईडी पछि मेगावाट चार्जरको दौडमा अब जिकर, १.२ मेगावाटको सुपर चार्जर लन्च गर्ने

जिकरले पिक पावर १.२ मेगावाटको पुर्ण रुपमा लिक्विड–कुल्ड चार्जिङ स्टेसन सार्वजनिक गरेको छ । आगामी अप्रिल २३ मा सांघाई अटो शोमार्फत सो स्टेसन औपचारिक रुपमा सार्वजनिक गरिने छ ।

हाल चाइना इलेक्ट्रिक भेइकल १०० फोरममा जिकर ग्रुपका भाइस प्रेसिडेन्ट झाओ युहुईले सो सुपर चार्जर सार्वजनिक गरे । सो सुपर चार्जिङ स्टेसनमा १० वटा प्लग हुनेछन् र ती प्रत्येकले १.२ मेगावाट पावर डेलिभर गर्नेछन् ।

जिकरले यो भन्दा पहिले ३६० किलोवाट र ६०० किलोवाट हुँदै ८०० किलोवाट सम्मको चार्जिङ स्टेसन विकास गरेको थियो । तीन वर्ष भित्रै कम्पनीले सो उपलब्धि हासिल गरिरहेको अवस्थामा अब १.२ मेगावाटको विकास गरेको हो । हाल चीनमा जिकरले ८२६ चार्जिङ स्टेसन संचालन गरिरहेको र यसमार्फत ४ हजार भन्दा बढी चार्जर रहेको बताइएको छ ।

झाओका अनुसार सन् २०२६ सम्ममा जिकरले १० हजार चार्जर बनाउने योजना छ र अल्ट्रा–फास्ट चार्जिङ युगको नेतृत्व गर्ने योजना जिकरको छ ।

१ मेगावाट भन्दा बढी अर्थात अल्ट्रा–फास्ट क्षमताको चार्जिङ स्टेसन निर्माण गर्ने जिकर पहिलो कम्पनी भने होइन । केही दिन पहिले बीवाईडीले पनि १ हजार किलोवाटको फास्ट चार्जर सार्वजनिक गरेको छ । सो चार्जरमार्फत प्रतिसेकेन्ड चार्ज गर्दा २ किलोमिटर अर्थात ५ मिनेट चार्ज गर्दा ४०० किलोमिटर गाडी गुडाउन सकिने छ ।

त्यसैगरी डिडीले पनि १ मेगावाटको चार्जर सार्वजनिक गरेको छ भने हुवावेले समेत अप्रिल २२ मा १ मेगावाटको चार्जर लन्च गर्ने घोषणा गरिसकेको छ ।