प्रिमियम इलेक्ट्रिक एसयूभी एलईभी ०१ नेपाल आउने

विश्वको प्रतिष्ठित डिजाइन हाउस सांघाई लन्च अटोमोटिभको पहिलो प्रिमियम एसयूभी एलईभी ०१ नेपाली बजारमा उपलब्ध हुने भएको छ । नेपालका लागि आधिकारिक वितरकको रुपमा वेबर ग्रुप अन्तर्गतको नेक्सन भेन्चर्स प्रालिले सो गाडी नेपाली बजारमा उपलब्ध गराउने बताएको छ ।

सांघाई लन्च अटोमोटिभले आफ्नो पहिलो राइट ह्यान्ड ड्राइभ मोडलको रुपमा तयार पारेको प्रिमियम एसयूभी एलईभी ०१ नेपालमा उपलब्ध हुनेछ ।

वेबर ग्रुपले नेपाली बजारमा एलईभी ०१ को सुरुवात गर्दैछ, जसले विद्युतीय सवारीको भविष्यतर्फको सकारात्मक कदम चाल्ने बताएको छ । यसबाट वातावरणमैत्री ड्राइभिङ अनुभव उपलब्ध गराउने छ र नेपाली अटोमोबाइल उद्योगको विकासमा महत्वपूर्ण योगदान पुर्याउने छ। यसले उच्च गुणस्तरीय सेवा प्रदान गरेर ग्राहकको सन्तुष्टिलाई प्राथमिकता दिने लक्ष्य राखेको छ। ग्राहकको विश्वास प्राप्त गर्न बिक्री पछि सेवा र प्राविधिक सहयोग पनि उपलब्ध हुने कम्पनीको भनाइ छ ।

प्रिमियम इलेक्ट्रिक एसयूभी एलईभी ०१ को लम्बाई ४६४० एमएम, चौडाई १८७० एमएम र उचाई १६५५ एमएम रहेको छ । यसको ह्विलबेस २७६० एमएम छ । १९ इन्चको ह्विल रहेको एलईभी ०१ को ग्राउन्ड क्लियरेन्स १९० एमएम छ ।

यसमा ६७.१ किलोवाट आवरको लिथियम आइरन फस्फेट ब्याट्री र ९९ किलोवाटको मोटर छ । यसले ५०० किलोमिटर भन्दा बढी रेन्ज दिने कम्पनीको दाबी छ । डीसी फास्ट चार्जरको प्रयोग गरी यसलाई ३५ मिनेटमै ३० देखि ८० प्रतिशतसम्म चार्ज गर्न सकिन्छ ।

आगामी साउन महिनामा सो गाडी नेपाली बजारमा उपलब्ध हुने कम्पनी स्रोतको भनाइ छ ।