बीवाईडीले नेक्स्ट जेन ब्लेड ब्याट्री अर्को वर्ष लन्च गर्ने

बीवाईडीले सवारी साधनका लागि अझै राम्रो रेन्ज पर्फमेन्स दिने ब्लेड ब्याट्रीको नेक्स्ट जेनेरेसन अर्को वर्ष लन्च गर्ने भएको छ ।

बीवाईडी सेन्ट्रल एसियाका म्यानेजिङ डाइरेक्टर काओ शुआङले हालै अजरबैजानको बाकुमा चलिरहेको युएन फ्रेमवर्क कन्भेन्सन अन क्लाइमेट चेन्ज सम्पन्न भए पश्चात चाइनिज सरकारी सञ्चार माध्यम सीजीटीएनसँगको अन्तर्वार्तामा सो कुरा बताएका हुन् । उनले सन् २०२५ मा सो ब्याट्री उपलब्ध हुने बताएका छन् ।

गत नोभेम्बर २२ मा प्रसारित अन्तर्वार्तामा उनले सो ब्याट्रीका कारण गाडीको रेन्ज अर्थात ड्राइभिङ डिस्टेन्स बढ्नुका साथै ब्याट्रीको आफ्नै लाइफ साइकल समेत बढ्ने बताए ।

गाडीमा प्रयोग गरिए पश्चात सो गाडीलाई इनर्जी स्टोरेज लगायतका अन्य एप्लिकेसनमा समेत प्रयोग गर्न सकिने उनको भनाइ छ ।

बीवाईडीले सबैभन्दा पहिले सन् २०२० मार्चमा फर्स्ट जेन ब्लेड ब्याट्री सार्वजनिक गरेको थियो । सो ब्याट्री लिथियम आइरन फस्फेट रसायनमा आधारित छ र यसले सेफ्टीमा जोड दिएको छ । हाल बीवाईडीका सबै मोडलमा यही ब्याट्री प्रयोग भइरहेको छ ।

हाल पावर ब्याट्री सेल उत्पादनको क्षेत्रमा बीवाईडी विश्वमै दोस्रो नम्बरमा पर्छ र केही वर्ष यता देखि नै सो ब्याट्री अपडेट गरिएको छैन ।

यद्यपि यसको वारेमा विस्तृत जानकारी भने सार्वजनिक भएको छैन । आगामी दिनमा यसको वारेमा अन्य थप समाचार समेत सार्वजनिक हुने नै छन् ।

बीवाईडीको ब्लेड ब्याट्री बीवाईडीका गाडीमा मात्र नभई टेस्ला, टोयोटा, फोर्ड, किया र हुन्डाई लगायतका ईभीमा समेत प्रयोग भएका छन् ।