यामाहाले चुपचाप बन्द गर्यो आर३ र एमटी ०३ को बिक्री, यस्तो छ कारण

यामाहाले आफ्ना मध्यम साइजका लोकप्रिय मोटरसाइकल आर३ र एमटी०३ गोप्य रूपमा बिक्री बन्द गरेको खुलासा भएको छ । यामाहा मोटर इन्डियाको आधिकारिक वेबसाइटमा यी दुवै बाइकका लागि बुकिङ विन्डो अझै खुला देखिए पनि रिपोर्टमा आर३ र एमटी०३ को आयात तथा बिक्री रोकिएको दाबी गरिएको छ ।

आर३ र एमटी०३ को बिक्री बन्द गर्नुको कारण कम्पनीले नयाँ वा अपडेटेड मोडल ल्याउने तयारी गरिरहेको हुन सक्ने अनुमान गरिएको छ। तर, यस विषयमा यामाहाले अहिलेसम्म कुनै आधिकारिक घोषणा दिएको छैन।

यामाहा आर३ र एमटी०३ दुवै मोटरसाइकल डिसेम्बर २०२३ मा भारतीय बजारमा लन्च गरिएका थिए । आर३ स्पोर्ट्स बाइक सेग्मेन्टमा आएको थियो भने एमटी ०३ नेकेड स्ट्रिट बाइकको रूपमा प्रस्तुत गरिएको थियो। यी दुवै बाइक पूर्ण रूपमा आयातित मोडल भएकाले, तिनको मूल्य सोही सेग्मेन्टका अन्य बाइकहरूभन्दा महँगो थियो । डिजाइन, लुक्स, फिचर र प्रदर्शनका हिसाबले प्रभावशाली भएता पनि उच्च मूल्य नै तिनको बिक्रीमा मुख्य चुनौती बनेको बताइन्छ ।

बाइक प्रेमीहरू लामो समयदेखि आर७, आर९, एमटी ०७ र एमटी ०९ जस्ता मोडलको लन्चको प्रतीक्षामा छन् । यद्यपि, यामाहा मोटर इन्डियाले ठूला क्षमताका बाइकहरूबारे निकट भविष्यमा के योजना बनाएको छ भन्ने विषयमा अहिलेसम्म स्पष्ट जानकारी सार्वजनिक गरेको छैन। हालै कम्पनीले इलेक्ट्रिक स्कुटर सेग्मेन्टमा दुई नयाँ मोडल प्रस्तुत गरेको थियो ।