मूल्य वृद्धिमा यामाहाले उछिन्यो होन्डा, टीभीएस र बजाजलाई, स्कुटरमा सबैभन्दा बढी वृद्धि

टु ह्विलर सेग्मेन्टमा प्रतिस्पर्धा गरिरहेका बजाज, टीभीएस, यामाहा र होन्डाले क्रमिक रुपमा मोटरसाइकल र स्कुटरको मूल्य वृद्धि गरेका छन् । अघिल्लो महिनाको असार १६ गते होन्डाले मूल्य वृद्धि गरेपछि त्यस लगत्तै अर्को दिन अर्थात असार १७ गते बजाजले पनि आफ्ना अधिकांश मोटरसाइकलको मूल्य बढाएको थियो ।

बजाजले यसअघि पनि हरेक महिनाजसो विभिन्न मोडलका बाइकको मूल्यमा समायोजना गर्दै आइरहेको थियो । यी दुई कम्पनीले मूल्य बढाएपछि यामाहाले यसै महिनाको ५ गते मूल्य वृद्धि ग-यो । यामाहाले मूल्य बढाएको ४ दिनपछि अर्थात साउन ९ गते टीभीएसले आफ्ना मोटरसाइकल तथा स्कुटरको मूल्य बढाएको हो । होन्डाबाट शुरु गरिएको मूल्य वृद्धि टीभीएससम्म आइपुगेको छ र अबको केही दिनभित्रै हिरो र केटीएम लगायत अन्य ब्रान्डले समेत मूल्य बढाउने तयारी थालेको बताइएको छ ।

नेपाली टु ह्विलर बजारमा सर्बाधिक बिक्री हुने यी ४ ब्रान्डले एकपछि अर्को गरी मूल्य बढाउँदै लगेका कारण अन्य ब्रान्डलाई समेत मूल्य बढाउन सहज वातावरण बनिरहेको देखिन्छ ।

यसपालीको मूल्य वृद्धिलाई हेर्दा सर्बाधिक बढी रकम यामाहाले बढाएको छ । यामाहाले मोटरसाइकलको हकमा ५ हजार र स्कुटरमा ८ हजार रुपैयाँसम्मले मूल्य बढाएको हो । प्रायः माग बढी भएका मोटरसाइकल र स्कुटरको मूल्य बढाएको यामाहाले माग न्यून भएका मोडलको हकमा भने पुरानै मूल्य कायम गरेको छ । यामाहापछि होन्डाले बढी रकम वृद्धि गरेको छ ।

मोटरसाइकलमा ३ हजारका दरले मूल्य बढाएको होन्डाले स्कुटरमा भने ६ हजार रुपैयाँसम्मले मूल्य वृद्धि गरेको छ । होन्डा एक्टिभा स्कुटरमा कम्पनीले ६ हजार रुपैयाँ बढाएको हो ।

हरेक महिनाजसो मूल्य वृद्धि गर्दै आइरहेको बजाजले यो सिजनामा ४ हजार रुपैयाँसम्मले मूल्य वृद्धि ग¥यो । बजाजका अधिकांश मोटरसाइकलमा २ देखि ३ हजार रुपैयाँसम्म वृद्धि गरिएकोमा डोमिनार ४०० मा कम्पनीले ४ हजार रुपैयाँले वृद्धि गरेको हो ।

त्यसैगरी स्कुटरको किर्तिमानी बिक्रीबाट चर्चामा आएको टीभीएसले मोटरसाइकलमा ५ हजार र स्कुटरमा ४ हजार रुपैयाँका दरले मूल्य बढाएको छ । हिजोमात्रै नयाँ भर्सनको एनटर्क सार्बजनिक गरेको टीभीएसले पुरानो मोडलको तुलनामा यसको मूल्य १२ हजार रुपैयाँसम्म बढी राखेको छ । यद्यपि यो नयाँ प्रविधिको फरक स्कुटर हो ।

यसअघि एनटर्क रेस एडिसनको मूल्य २ लाख ६५ हजार ९ सय र सोही मोडलको स्क्वाड एडिसनको २ लाख ७० हजार ९ सय कायम गरिएकोमा नयाँ भर्सन अर्थात बीएस ६ र आरटीएफआई इन्जिनयुक्त नयाँ एनटर्कको मूल्य २ लाख ७७ हजार ९ सय रुपैयाँ तोकिएको हो ।