चार महिनामा ३ हजार २०३ युनिट ईभी भित्रिए, बाइक तथा स्कुटरको आयात २५ प्रतिशतले वृद्धि

काठमाडौं–चालू आर्थिक वर्षको चार महिनाको अवधिमा ३ हजार २०३ युनिट विद्युतीय गाडी (ईभी) नेपाल भित्रिएका छन् । गत आर्थिक वर्षको सोहि अवधीको तुलनामा यस वर्ष २८४ युनिट कम ईभी भित्रिएको हो । यस वर्ष गत आर्थिक वर्षको तुलनामा ८.१४ प्रतिशतले ईभीको आयात घटेको हो ।

ईभी र इन्धन गरी ६ हजार ४३२ युनिट सवारी साधन भित्रिएका छन् । गत आर्थिक वर्ष २०८१/८२ को सोही अवधिमा भने ६ हजार २७ युनिट सवारीसाधन भित्रिएका थिए ।

चालू आर्थिक वर्षको साउनदेखी कात्तिकसम्मको अवधिमा ७ अर्ब ५४ करोड ८२ लाख रुपैयाँ बराबरको ३ हजार २०३ युनिट ईभी नेपाल भित्रिएका हुन् । उक्त आयातबाट सरकारले ४ अर्ब ६८ करोड ८९ लाख रुपैयाँ बराबरको राजस्व संकलन गरेको छ ।

त्यसैगरी, चालू आर्थिक वर्षको चार महिनाको अवधिमा इन्धन र ईभी गरी १ लाख ६ हजार ६९० युनिट दुई पांग्रे सवारी साधन आयात भएका छन् । गत आर्थिक वर्षको तुलनामा यस वर्ष इन्धन र ईभी दुवै सेग्मेन्टका दुई पांग्रे सारी साधनको आयात बढेको छ । गत वर्षको तुलनामा यस वर्ष २५.७ प्रतिशतले बाइक तथा स्कुटरको आयात बढेको हो ।

साउनदेखी कात्तिकसम्मको अवधिमा इन्धनतर्फ मात्र एक लाख ६१७ युनिट बाइक तथा स्कुटर भित्रिएका छन् । उक्त आयातबाट सरकारले १२ अर्ब ४७ करोड ८५ लाख रुपैयाँ बराबरको राजस्व संकलन गरेको छ ।

चालू आर्थिक वर्षको यस अवधिमा ईभीतर्फ ५८ करोड ८० लाख रुपैयाँ बराबरको ६ हजार ७३ युनिट ईभी बाइक तथा स्कुटर आयात भएको छ । उक्त आयातबाट सरकारले २० करोड ५७ लाख रुपैयाँ बराबरको राजस्व संकलन गरेको छ ।