टीभीएस अपाचे रेसिङ सम्पन्न, विजेतालाई अन्तर्राष्ट्रिय सर्किटमा प्रतिस्पर्धा गर्ने अवसर

काठमाडौं– टीभीएस मोटर कम्पनीले अपाचे अनुभव (एआरई–जीपी) कार्यक्रम पहिलोपटक नेपालमा सम्पन्न गरेको छ । टीभीएस अपाचे सिरिजको २० वर्ष पूरा भएको अवसर पारेर सुरु गरिएको यस रेसिङ कार्यक्रमले नेपाली चालकलाई अन्तर्राष्ट्रिय स्तरको मोटरस्पोट्र्स अनुभव प्रदान गर्ने लक्ष्य लिएको कम्पनीले जनाएको छ ।

सतुंगलस्थित सवारी साधन तालिम तथा अनुसन्धान केन्द्रमा सम्पन्न छनोट चरणमा ६० जना चालकले प्रतिस्पर्धा गरेका थिए भने करिब २०० जना दर्शकको उपस्थिति रहेको थियो । १० वटा चुनौतीपूर्ण मोड समेटिएको पेशागत रूपमा तयार पारिएको ट्र्याकमा चालकहरूको प्रदर्शन सबैभन्दा छिटो घुम्ती समयका आधारमा मूल्यांकन गरिएको थियो ।

प्रतियोगितामा १६० सीसी, २०० सीसी र ३१० सिसी गरी तीन वर्ग समावेश गरिएको थियो । प्रत्येक वर्गका उत्कृष्ट तीन चालकलाई जनही २५ हजार रुपैयाँ नगद पुरस्कारका साथै विशेष टीभीएस राइडिङ सामग्री प्रदान गरिएको छ ।

साथै, विजेताहरूले भारतको चेन्नईस्थित मद्रास अन्तर्राष्ट्रिय सर्किटमा आयोजना हुने एआरई–जीपी फाइनल चरणमा प्रतिस्पर्धा गर्ने अवसर प्राप्त गरेका छन् । उक्त रेसिङ प्रतियोगिताको १६० सिसी वर्गमा सुजन थापा विजयी भए भने २०० सिसीमा अभिनव राज मल्ल र ३१० सिसीमा दिलिप दनुवारले बाजी मारे ।

कार्यक्रममा टीभीएस रेसिङका अनुभवी चालकहरूले सहभागीहरूलाई पेशागत तालिम र मार्गदर्शन प्रदान गरेका थिए । टिभिएस मोटर कम्पनीका प्रिमियम व्यवसाय प्रमुख विमल सुम्ब्लीले टीभीएस अपाचेको दुई दशक लामो रेसिङ यात्रालाई अन्तर्राष्ट्रिय स्तरमा विस्तार गर्नु स्वाभाविक निरन्तरता भएको बताए ।

त्यस्तै, जगदम्बा मोटर्सका प्रबन्ध निर्देशक शाहिल अग्रवालले मोटरस्पोट्र्सले युवाहरूको सम्भावनालाई सही दिशामा लैजाने उल्लेख गर्दै एआरई–जीपीले नेपाली चालकलाई अन्तर्राष्ट्रिय मञ्चमा पुग्ने ढोका खोल्ने विश्वास व्यक्त गरे ।