टप गियरले सार्वजनिक ग-यो टप २० कार, टप ६ मा प-यो नेपालमा समेत उपलब्ध एमजी४

अटोमोबाइल सम्बन्धी लोकप्रिय न्युज पोर्टल टप गियरले मन पर्ने टप २० इलेक्ट्रिक कारको सूची सार्वजनिक गरेको छ । यस अनुसार पहिलो नम्बरमा रेनो ५ परेको छ । त्यसैगरी दोस्रो र तेस्रो नम्बरमा क्रमशः हुन्डाई आयोनिक ५ एन र रोल्स रोयस स्पेक्टर परेका छन् ।

त्यसैगरी चौथो, पाँचौ र छैटौं नम्बरमा क्रमशः पोर्स्चे टेक्यान, टेस्ला मोडल ३ र एमजी४ परेका छन् । यी सबै मध्ये नेपाली बजारमा उपलब्ध ईभी एमजी४ मात्रै हो । अन्य ईभी भने नेपाली बजारमा उपलब्ध छैनन् ।

टप गियरको सो सूचीमा सातौ देखि दशौं सम्म क्रमशः किया ईभी३, भल्वो ईएक्स३०, स्कोडा इलरोक र डासिया स्प्रिङ रहेका छन् ।

युकेबाट प्रकाशित हुने सो अनलाइन म्यागेजिनले यस्ता प्रिमियम ईभीको सूची सार्वजनिक गरेको हो । बाहिरबाट हेर्दा त्यस्तो नदेखिए पनि यसको रेन्ज, चार्जिङ, इक्विपमेन्ट र जिप्पी डाइनामिक्स तथा अन्य केही स्टाइलका कारण यो रोजाइमा परेको टप गियरले बताएको छ ।

नेपालमा उपलब्ध एमजी४ को कम्फर्ट भेरिएन्टमा ५१ किलोवाट आवर क्षमताको ब्याट्री र लक्जरी भेरिएन्टमा ६४ किलोवाट आवरको ब्याट्री रहेको छ । दुवैमा ९९ किलोवाटको मोटर छ । सिंगल चार्जमा यसले ४३५ किलोमिटरसम्म रेन्ज दिने दावी गरिएको छ ।

हेर्दा निकै नै आकर्षक देखिने एमजी४ ‘युके कार अफ द इयर–२०२३’ बाट सम्मानित ईभी हो भने यसले युरो एनक्यापमा ५ स्टार रेटिङ हात पारेको छ । यो ईभीको प्रमुख विशेषताका रुपमा इन्डिभिजुअल सस्पेन्सन र रियर ह्विल ड्राइभलाई लिने गरिएको छ । यो फिचर नेपाली बजारमा उपलब्ध यहि सेग्मेन्टका अन्य ईभीमा पाउन नसकिने कम्पनीको दावी छ ।

यात्रुहरुको सुरक्षाका लागि यसमा रियर आइसोफिक्स, रिभर्स क्यामेरा, फ्रन्ट साइड एयर व्याग, टायर प्रेसर मनिटरिङ सिस्टम र सिट बेल्ट रिमाइन्डर जस्ता फिचर दिइको छ । साथै यसमा मोबाइल फोन ब्लुटुथ की, ५ वटा ड्राइभिङ मोड र टचस्क्रिन इन्फोटेन्मेन्ट सिस्टम लगायत कम्फर्ट फिचर पाउन सकिन्छ ।

नेपाली बजारमा उपलब्ध एमजी४ कम्फर्ट भेरिएन्टको मूल्य ४१ लाख ४९ हजार र डिलक्स भेरिएन्टको मूल्य ४९ लाख ९९ हजार रुपैयाँ तोकिएको छ ।