यस्ता छन् नेपाली बजारमा उपलब्ध थ्री ह्विलर (मूल्य र इन्जिन क्षमता सहित)

नेपाली अटो बजारमा अटो रिक्सा समेत भनिने थ्री ह्विलरको माग बढ्न थालेको छ । विशेषतः तराई र ग्रामीण भेगका शहरी क्षेत्रमा यस्ता साधनको लोकप्रियता बढेपछि कारोबार समेत बढ्न थालेको हो ।

हाल नेपालमा बजाज, टीभीएस, पियाजिओ र अतुल ब्रान्डका यस्ता साधन बढी लोकप्रिय मानिन्छन् । नेपाल सरकारले युवा स्वोराजगारसँग यस्ता साधनलाई जोडेका कारण न्यूनतम लगानीमै बैंक तथा वित्तीय संस्थामार्फत खरिद गर्न सकिने हुँदा यस्ता साधनमा बेरोजगार युवाहरुको पहुँच बढ्दो छ । हालै सरकारले ल्याएको मौद्रिक नीतिमार्फत यस्ता युवाहरुलाई सस्तो मूल्यमा कर्जा दिने बताइएको छ ।

बैंक तथा वित्तीय संस्थाले ९० प्रतिशतसम्म फाइनान्स गर्ने हुँदा सुरुमा एकदमै कम रकम भुक्तानी गरी यस्ता साधन खरिद गर्न सक्छन् । काठमाडौं उपत्यका र गण्डकी प्रदेशका केही शहरमा संचालन गर्न रोक लगाइए पनि अन्य स्थानमा भने यस्ता साधनलाई सहजै चलाउन सकिन्छ ।

नेपाली बजारमा सर्बाधिक बिक्री हुने थ्री ह्विलरमा बजाज आरई अग्रस्थानमा छ । बजाज आरईका प्यासेन्जर र कार्गो गरी दुबै प्रकारका यस्ता साधन उपलब्ध छन् । जसमध्ये प्यासेन्जर बोक्ने आरई फोरएस पेट्रोलको मूल्य ५ लाख ८९ हजार ९ सय र म्याक्सिमा कार्गोको ६ लाख ४४ हजार ९ सय रुपैयाँ पर्छ । यी दुबै अटोमा २३६ सीसी क्षमताको इन्जिन जडान गरिएको छ । नेपाली बजारमा गोल्छा अर्गनाइजेसनले यसको कारोबार गर्दै आइरहेको छ ।

बजाज आरईपछि अर्को लोकप्रिय थ्री ह्विलर टीभीएसको पनि २ वटा मोडल उपलब्ध छ । टीभीएसको प्यासेन्जर अटोमात्र कारोबार भैरहेको छ । जसमध्ये ड्युराम्याक्सको मूल्य ५ लाख ७४ हजार ९ सय र किङ डिलक्स जिएस प्लसको ५ लाख ४३ हजार ९ सय रुपैयाँ निर्धारण गरिएको छ । यी अटो रिक्सामा २२५ सीसी क्षमताको इन्जिन जडान गरिएको छ । टीभीएस बाइकको समेत आधिकारिक बितरक रहेको जगदम्बा मोटर्सले यसको आयात गरी कारोबार गर्दै आइरहेको छ ।

इटालियन ब्रान्ड पियाजियोको भने कार्गो र प्यासेन्जर दुबै प्रकारका अटोहरु उपलब्ध छन् । जसमध्ये ४ सिट क्षमता भएको एपेसिटीको मूल्य ५ लाख ३९ हजार ९ सय र ६ सिट क्षमताको एपेसिटीको ६ लाख ५० हजार रुपैया निर्धारण गरिएको छ । यी अटोमा क्रमशः २०० र २३० सीसी क्षमताको इन्जिन जडान गरिएको छ । त्यसैगरी एपे कार्गोको भने ५ लाख ४९ हजार ९ सय रुपैयाँ पर्छ । यसमा २३० सीसी क्षमताको इन्जिन उपलब्ध छ । नेपाली बजारमा यो अटोलाई दुगड ब्रदर्स एन्ड सन्सले कारोबार गर्दै आइरहेको छ ।

त्यसैगरी भारतीय बजारमा लोकप्रिय बन्दै गएको अतुल ब्रान्डको थ्री ह्विलर समेत नेपालमा कारोबार हुँदै आइरहेको छ । अतुलको नेपालस्थित आधिकारिक बितरक भीजी अटोमोबाइल्सले हालै नयाँ जेनेरेसनको रिक अटो सार्बजनिक गरेको छ । यो अटोको मूल्य ५ लाख ५५ हजार ९ सय रुपैयाँ तोकिएको छ । यसमा २ सय सीसी क्षमताको इन्जिन जडान गरिएको छ ।