ईभीको हिस्सा ५० प्रतिशत पुर्याउने लक्ष्यलाई टाटा मोटर्सले गर्यो परिमार्जन

टाटा मोटर्सले सन् २०३० सम्ममा ईभीको हिस्सा ५० प्रतिशत पुर्याउने लक्ष्यमा परिमार्जन गरेको छ । ईभी सेग्मेन्टको बिक्री सुस्त हुँदै गएपछि टाटाले उक्त लक्ष्यलाई घटाएर ३० प्रतिशतमा झारेको हो ।

टाटा मोटर्सका अनुसार २०३० सम्ममा भारतको प्यासेन्जर कार बजार ६० लाख यूनिट पुग्ने कम्पनीले अनुमान लगाएको छ । जसअनुसार टाटाको हिस्सा १८ देखी २० प्रतिशत हाराहारी पुग्ने र वार्षिक १० देखी १२ लाख कार बिक्री गर्ने उसको अनुमान छ ।

२०३० सम्ममा कम्पनीले ३ देखी ४ लाख युनिट हाराहारीमा इलेक्ट्रिक कार बिक्री गर्दै कुल बिक्रीको ३० प्रतिशत हिस्सा होल्ड गर्ने नयाँ लक्ष्य लिएको हो । टाटाले हाल वार्षिक ७३ हजार हाराहारी इलेक्ट्रिक कार बिक्री गर्दै आएको छ ।

गत त्रैमासिकको तथ्यांक अनुसार टाटाले तीन महिनामा ५ हजार ५०० देखी ७ हजार ५०० हाराहारीमा इलेक्ट्रिक कार बिक्री गर्दै आएको छ । यसैगरी गत अप्रिल र मे महिनामा ईभीको बिक्री गत वर्षको सोही अबधीको तुलनामा निकै कम देखिएएको छ । यसरी बिक्री घट्दै गएपछि कम्पनीले आफ्नो पूर्बनिर्धारित लक्ष्यमा परिमार्जन गरेको सहजै अनुमान गर्न सकिन्छ ।

ईभीको बिक्री घट्ने अनुमान गरेको कम्पनाीले अर्कोतर्फ सीएनजी सवारी साधनको बिक्री भने आगामी वर्षहरूमा बढ्ने अनुमान लगाएको छ । सन् २०३० सम्ममा भारतीय ईभी बजारको हिस्सा २० प्रतिशत पुग्ने अनुमान गरिएको छ । सोही अनुमानलाई आधार मानेर टाटाले उक्त समय अवधीसम्ममा १६ देखी १८ हजार करोड भारु ईभी प्रोजेक्टमा लगानी गर्ने योजना समेत बनाएको छ ।

ईभी अन्तर्गत हाल टाटासंग टियागो, पन्च, नेक्सन र टिगोर मोडल उपलब्ध छ भने छिट्टै ह्यारियर र कर्भ ईभी आउने तयारीमा रहेको छ ।