भारतमा टाटा पन्च ईभीको चर्चा, नेपालमा करको डर

भारतीय बजारमा हालै लन्च भएको टाटाको नयाँ इलेक्ट्रिक कार पन्च ईभी अहिले चर्चामा छ ।

दुई ब्याट्री अप्सनमा उपलब्ध सो ईभीको स्ट्यान्डर्ड रेन्ज स्मार्ट, स्मार्ट प्लस, इड्भेन्चर, एम्पावर्ड र एम्पावर्ड प्लस गरी कुल ५ ट्रिममा उपलब्ध हुनेछ भने लङ रेन्ज चाहिँ इड्भेन्चर, एम्पावर्ड र एम्पावर्ड प्लस ट्रिममा उपलब्ध हुनेछ ।

पन्च ईभीमा टाटाले नेक्सनमा जस्तै दुई ब्याट्री अप्सन दिएको छ । सो नयाँ ईभीमा २५ र ३५ किलोवाट आवरको ब्याट्री प्याक जडान गरिएको छ भने मोटर ६० किलोवाट र ९० किलोवाट क्षमताको दिइएको छ । यसले ३१५ र ४२१ किलोमिटर रेन्ज दिने दावी गरिएको छ ।

पन्च ईभीको नयाँ र आकर्षक फिचरका कारण हाल यसले चर्चा पाएको छ । यसका साथै नेपालमा यो गाडी कहिले भित्रिएला भन्ने चासो हुन पनि स्वाभाविकै हो ।

हाल नेपाली बजारमा टाटाकै नेक्सन ईभी र टियागो ईभी जस्ता इलेक्ट्रिक कारले बजार लिइरहेको समयमा पन्च ईभी अर्को आकर्षण बन्ने अनुमान धेरैको छ । यद्यपि टाटा मोटर्सको नेपालका लागि आधिकारिक वितरक सिप्रदी ट्रेडिङ भने अहिले नै धेरै उत्साही भने छैन ।

हाल नेपाली बजारमा विद्युतीय कारको कर बढ्ने चर्चा चलिरहेको छ । अर्थमन्त्री डा. प्रकाशशरण महतले सार्वजनिक रुपमै नाडाको कार्यक्रममा विद्युतीय कारमा दिइएको कर सहुलियतबाट सामान्य जनताले केही नपाएको बताएका थिए । यसबाट पनि आगामी दिनमा ईभीको कर बढ्ने अनुमानलाई बल पुगेको छ ।

यो अवस्थामा आगामी दिनमा सरकारको कर नीतिका आधारमा मात्र टाटा पन्चको नेपाली बजार भविष्य पनि निर्धारण हुने सिप्रदी ट्रेडिङ स्रोतले बताएको छ । सरकारको कर नीतिका आधारमा मात्र टाटा पन्च नेपालमा भित्रिने समय निर्धारण हुने बताइएको छ ।

यस अनुसार कर नीति स्पष्ट भए पछि मात्र टाटा पन्च नेपाली बजारमा उपलब्ध हुने र यसको मूल्य तय हुने अनुमान गर्न सकिन्छ ।