टाटा मोटर्सले किन्ने भयो फोर्ड इन्डियाको प्लान्ट, फोर्डका कर्मचारीले टाटामा काम गर्ने

टाटा प्यासेन्जर इलेक्ट्रिक मोबिलिटी लिमिटेडले फोर्ड इन्डियाको सानन्द, गुजरात प्लान्ट ७२६ करोड भारुमा किन्ने भएको छ । यस सम्झौता अन्तर्गत टाटाले फोर्ड इन्डियासँग युनिट ट्रान्सफर सम्झौतामा हस्ताक्षर गरेको छ । यसमा फोर्ड इन्डियाको सवारी साधन निर्माण प्लान्ट, सम्पूर्ण जग्गा, भवन, मेसिनरी र उपकरण समावेश हुनेछ ।

यद्यपि सो सम्झौता अनुसार फोर्डले आफ्नो पावरट्रेन निर्माण प्लान्ट सञ्चालन गर्न जारी राख्नेछ र यसका लागि टाटाबाट पावरट्रेन निर्माण प्लान्टको भवन र जग्गा पुनः भाडामा लिने तयारी गरिरहेको छ ।

टाटा मोटर्सले फोर्ड इन्डियाका सम्पूर्ण योग्य कर्मचारीलाई टाटा मोटर्समै रोजगारी दिने सहमत भएको छ । यस प्लान्टमा ३० हजार ४३ जना प्रत्यक्ष र करिब २० हजार जना अप्रत्यक्ष रोजगारीमा छन् । दुई कम्पनीबीच भएको सम्झौता अनुसार सानन्द प्लान्टमा काम गर्ने सबै योग्य कर्मचारीलाई टाटा मोटर्समा सरुवा गरिने छ ।

फोर्ड इन्डियाको सानन्द प्लान्ट ३५० एकडमा फैलिएको छ भने कम्पनीको इन्जिन उत्पादन गर्ने प्लान्ट ११० एकडमा फैलिएको छ । यस वर्षको मेमा, टाटा मोटर्सले फोर्डको प्यासेन्जर कार निर्माण प्लान्टलाई टेकओभर गर्नको लागि स्वीकृति पाएको थियो ।

फोर्ड मोटर कम्पनीले गत वर्ष नै भारतबाट आफ्नो व्यापार बन्द गर्ने निर्णय गरेको थियो ।