स्टेयरिङ समाउँदा जिम्मेवारी पनि समाउनुहोस्

सडक केवल गन्तव्यमा पुग्ने मार्ग मात्र होइन, हजारौँ मानिसका सपना, आशा र जीवन जोडिएको साझा थलो हो । जब हामी स्टेयरिङ समात्छौँ, हामी केवल गाडी नियन्त्रण गरिरहेका हुँदैनौँ; हामी आफ्नो र अरूको जीवनको जिम्मेवारी पनि समाइरहेका हुन्छौँ । सानो लापरवाहीले पलभरमै खुसीहरूलाई आँशुमा बदल्न सक्छ । त्यसैले, "स्टेयरिङ समाउँदा जिम्मेवारी पनि समाउनुहोस्" भन्ने सन्देशलाई आत्मसात् गर्नु आजको आवश्यकता हो ।  

        सडक दुर्घटना न्यूनीकरण गर्न र सुरक्षित यात्रा सुनिश्चित गर्न तलका जीवनोपयोगी उपायहरू अपनाउनु अनिवार्य छ:

• यात्रा सुरु गर्नुभन्दा पहिले आफ्नो सवारी साधनको अवस्था जाँच गर्नु पहिलो जिम्मेवारी हो ।
• ब्रेकले सही काम गरेको छ कि छैन र टायरमा हावाको चाप उचित छ कि छैन भन्ने कुरामा ध्यान दिनुहोस् ।
• हेडलाइट, ब्याक लाइट र साइड इन्डिकेटरहरू चालू अवस्थामा हुनुपर्छ, विशेष गरी रातिको समयमा ।
• मदिरा सेवन गरेर सवारी चलाउनु भनेको जानीजानी मृत्युलाई निम्तो दिनु हो । मदिराले मस्तिष्कको सोच्ने र निर्णय लिने क्षमतालाई कमजोर बनाउँछ ।
• थोरै मात्र मदिराले पनि तपाईँको 'रिएक्सन टाइम' ढिलो बनाउँछ । त्यसैले "पिउनु छ भने नचलाउनुहोस्, चलाउनु छ भने नपिउनुहोस्" भन्ने नियम पालना गर्नुहोस् ।
• गाडी चलाउँदा फोनमा कुरा गर्ने वा म्यासेज हेर्ने काम कदापि नगर्नुहोस् । एक सेकेन्डको ध्यान मोडिनु नै दुर्घटनाको कारण बन्न सक्छ ।
• ठुलो स्वरमा संगीत सुन्ने वा सहयात्रीसँग अत्यधिक गफगाफमा अल्झिँदा चालकको ध्यान सडकबाट हट्न सक्छ ।
• "छिटो गए भन्न सकिन्न, बिस्तारै गए अवश्य पुगिन्छ" भन्ने उखानलाई मनन गर्नुहोस् । सडकको अवस्था र तोकिएको गति सीमाभित्रै रहेर सवारी चलाउनुहोस् । उच्च गतिमा सवारी नियन्त्रण बाहिर जाने सम्भावना बढी हुन्छ ।
• अगाडि गुडिरहेको सवारी साधनबाट पर्याप्त दूरी (Safe Following Distance) कायम राख्नुहोस् ताकि आकस्मिक ब्रेक लगाउनु पर्दा ठक्कर नलागोस् ।
• कार चालक र यात्रुले सधैँ सिट बेल्ट बाँध्नुपर्छ, दुई पाङ्ग्रे सवारी चालक र पछाडि बस्ने यात्रु दुवैले गुणस्तरीय हेल्मेट लगाउनु अनिवार्य छ । यसले दुर्घटनाको समयमा शरीरलाई कडा ठक्करबाट बचाउँछ ।
• ट्राफिक लाइट, जेब्रा क्रसिङ, र सडकका संकेतहरू हाम्रो सुरक्षाका लागि बनाइएका हुन् ।
• जथाभाबी ओभरटेक नगर्नुहोस् । जहिले पनि दाहिने तर्फबाट मात्र ओभरटेक गर्नुहोस् र मोड्नुअघि इन्डिकेटरको प्रयोग गर्नुहोस् ।
• पैदल यात्रीलाई प्राथमिकता: जेब्रा क्रसिङ र विद्यालय क्षेत्रमा सवारीको गति कम गर्नुहोस् र पैदल यात्रीलाई पहिलो प्राथमिकता दिनुहोस्।

        सडक सुरक्षा कुनै एक निकायको काम होइन, यो हरेक स्टेयरिङ समाउने हातको जिम्मेवारी हो । स्टेयरिङ समात्ने हातले केवल गाडी होइन, धेरैको भविष्य समाइरहेको हुन्छ । थकान, निन्द्रा वा असावधानीको क्षणमा लिएको एउटा गलत निर्णयले फर्किन नसक्ने पीडा छोड्न सक्छ ।

        एकैछिन रोकिएर सोचौँ - घरमा तपाईँको सुरक्षित आगमनको प्रतीक्षामा आमाको चिन्तित आँखा, बुबाको अटुट भरोसा, श्रीमतीको सिन्दूर र छोराछोरीको बालसुलभ मुस्कान बसिरहेको हुन्छ । स्टेयरिङ समात्दा गरिने तपाईँको सानो सचेतताले कसैको सिउँदो उजाडिनबाट जोगिन सक्छ, कसैको काख रित्तिनबाट बच्न सक्छ ।

        त्यसैले आजैदेखि मनदेखि प्रतिज्ञा गरौँ - म स्टेयरिङसँगै जिम्मेवारी समाउनेछु, म जिम्मेवार चालक बन्नेछु र सडकलाई सबैका लागि सुरक्षित बनाउनेछु ।

ट्राफिक नियम जानौँ पनि, मानौँ पनि ।

–प्र.ब.ना.नि. बिष्णु थापा

प्रमुख–जिल्ला ट्राफिक प्रहरी कार्यालय, सिन्धुपाल्चोक