एनपीएल सिजन २ का सर्वोत्कृष्ट खेलाडी बने रोहित, पाए ५७ लाख मूल्यको जेइको जे५ कार

काठमाडौं - लुम्बिनी लायन्सका कप्तान रोहितकुमार पौडेल नेपाल प्रिमियर लिग (एनपीएल) दोस्रो संस्करणको सर्वोत्कृष्ट खेलाडी बनेका छन् । रोहितले जेइको जे५ कार पाए ।

लुम्बिनी लायन्सलाई च्याम्पियन बनाउन महत्त्वपूर्ण भूमिका खेलेका कप्तान रोहितले प्रतियोगिताभर उत्कृष्ट अलराउण्ड प्रदर्शन गरे । उनले ब्याटिङतर्फ कुल २७६ रन बनाउनुका साथै बलिङमा १० विकेट लिएर प्रतियोगिताकै सर्वोत्कृष्ट नेपाली खेलाडीको उपाधि हात पारेका हुन् ।

विजेता खेलाडी पौडेललाई ओमोडा एन्ड जेइकोको नेपालका लागि आधिकारिक वितरक एसपीजी अटोमोबाइल्सका निर्देशक सन्दिप शारडा र गौरव शारडाले सो गाडी हस्तान्तरण गरे ।

ओमोडा एन्ड जेइकोले नेपालकै प्रतिष्ठित क्रिकेट लिग ‘नेपाल प्रिमियर लिग (एनपीएल)’ को सिजन २ मा ‘ड्रिभन बाइ’ पार्टनरका रूपमा सहकार्य गरेको थियो । नेपाली खेल समुदायसँग आफ्नो सम्बन्धलाई अझ मजबुत बनाउँदै, ओमोडा एन्ड जेइकोले एनपीएल सिजन २ को “म्यान अफ द टुर्नामेन्ट” लाई ब्रान्डको एक प्रिमियम गाडी उपहार दिने घोषणा पहिले नै गरेको थियो ।

जेइको जे५ को मूल्य हाल ५६ लाख ९९ हजार रुपैयाँ छ । यो फुल इलेक्ट्रिक एसयूभी हो । जेइको जे५ मा १५५ किलोवाट क्षमताको इलेक्ट्रिक मोटर र ५८.९ किलोवाट आवरको ब्याट्री प्याक जडान गरिएको छ, जसले एकपटकको चार्जमा ४०२ किलोमिटर रेन्ज प्रदान गर्छ ।

साहसिक यात्राका लागि बनाइएको जेइको जे५ एसयूभी आरामदायी विशेषताहरूसँगै अल–रोड–रेडि देखिने रगेड बनावट तथा डिजाइनको संयोजन हो । जे५ को सार्प–एन्गुलर डिजाइन विशेषताहरू ‘रेन्ज रोभर’को डिजाइन विशेषताहरूसँग तुलनायोग्य रहेको छ । यसका साथै लेभल २ एडास (एड्भान्स्ड ड्राइभर असिस्टेन्स सिस्टम), श्रेणीमा उत्कृष्ट इन्टिग्रेटेड प्यानोरोमिक सनरुफ, ५४० डिग्री सराउन्ड भ्यु क्यामरा र इन्डिपेन्डेन्ट सस्पेन्सनजस्ता उच्च गुणस्तरका सुविधाहरू समावेश रहेका छन् । जसले यसलाई सहरी यात्रा तथा हल्का अफरोड यात्रा दुवैका लागि एकदमै उपयुक्त बनाउँछ ।

जे५ को भित्री भाग फराकिलो र प्रविधि तथा सुविधाहरूले सुसज्जित रहेको छ । यसमा कनेक्टेड कार टेक्नोलोजिसहितको भेन्टिलेटेड सिट, पूर्ण डिजिटल स्मार्ट इन्सट्रयुमेन्ट क्लस्टर, १३२० मिलिमिटर चौडाइ भएको फराकिलो र आरामदायी सेकेन्ड–रो सिट, २५६–कलर एम्बिएन्ट लाइटिङ र ४८० लिटरको ट्रंक स्पेस तथा ३६ इन्टेलिजेन्ट स्टोरेज कम्पार्टमेन्टहरू समावेश रहेका छन् ।

जेइको जे–फाइभको लम्बाई ४३८० मिलिमिटर, चौडाई १८६० मिलिमिटर र उचाई १६५० मिलिमिटरको छ भने यसमा १८ इन्चको अग्लो अलोय ह्विल्स रहेको छ ।

जेइको जे५ ले चालक–यात्रुको सुरक्षालाई पहिलो प्राथमिकतामा राख्दछ । जेइको जे५ मा लेभल २ एडासको विशेषताहरू समावेश रहेको छ जस अन्तर्गत ‘फरवार्ड कोलिजन वार्निङ (एफसिडब्लु), ब्लाइन्ड स्पट मनिटरिङ (बिएसएम), इन्टिग्रेटेड क्रुज कन्ट्रोल, इमर्जेन्सि ब्रेकिङ’, र १९ वटा थप इन्टेलिजेन्ट सुरक्षा विशेषताहरू रहेका छन् ।

एनपीएलको अघिल्लो संस्करणमा सुदूरपश्चिम रोयल्सका कप्तान दीपेन्द्रसिंह ऐरीले सर्वोत्कृष्ट खेलाडी बन्दै ओमोडा इ५ कार प्राप्त गरेका थिए । त्यसबेला ओमोडाले टीडीएससमेत आफैं तिर्दै ऐरीलाई आफ्नो ब्रान्ड एम्बेसडर नियुक्त गरेको थियो । ओमोडाका गाडी पनि एसपीजी अटोमोबाइल्सले नै बिक्री-वितरण गर्छ ।