प्रोटोनको वर्ल्ड कप अफर : गेम अफ गोल्स, चर्चित खेलाडीद्वारा हस्ताक्षरित बल पाइने

काठमाडौं – प्रोटोनको नेपालका लागि आधिकारिक वितरक जगदम्बा मोटर्सले विश्वकप फुटबललाई लक्षित गरी ‘गेम अफ गोल्स’ नामक अफर सञ्चालन गरेको छ ।

हाल विश्वकप फुटबलको प्रत्यक्ष प्रसारण गराइरहेको हिमालय टीभीमा आउने फुटबल सम्बन्धी कार्यक्रम ‘फुटबल २६’ को ‘इन एसोसिएसन विथ’ पार्टनर प्रोटोन हो ।

प्रोटोन गाडी टेस्ट ड्राइभ गर्ने र बुकिङ गर्ने ग्राहकहरुले नेपाल आउने भारतका राष्ट्रिय खेलाडीका साथै नेपाल र अन्य देशका चर्चित फुटबल खेलाडीहरुले हस्ताक्षर गरेको बल प्राप्त गर्नेछन् । त्यसैगरी फुटबल हेर्नका लागि प्रयोगमा रहेको ‘डिगो’ एपको सब्स्क्रिप्सन समेत प्राप्त गर्नेछन् ।

नेपालमा हाल प्रोटोनको ईमास ७ गाडी उपलब्ध छ । यसको प्राइम र प्रिमियम गरी दुई भेरिएन्ट उपलब्ध छ । यसको मूल्य क्रमशः ४६ लाख ९९ हजार र ६७ लाख ९९ हजार रुपैयाँ छ ।

जगदम्बा मोटर्सले अबको केही समय पश्चात नेपाली बजारमा प्रोटोन ईमास ५ ईभी समेत भित्र्याउने तयारी गरिरहेको छ । जगदम्बा मोटर्सका अनुसार, नेपालमा प्रोटोन ईमास७ ले प्राप्त गरेको प्रतिक्रिया अत्यन्त उत्साहजनक रहेको छ । यसले नेपाली उपभोक्ता विद्युतीय सवारीतर्फ आकर्षित भइसकेका छन् र गुणस्तरीय विकल्पको खोजीमा रहेको स्पष्ट संकेत दिएको छ । आगामी योजनाहरूलाई लिएर कम्पनी निकै उत्साहित रहेको छ ।

सन् २०२६ मा मलेसियाको सर्वाधिक बिक्री भएको विद्युतीय सवारी बनेको ईमास५ शहरी जीवनशैली र नयाँ पुस्ताको गतिशीलतालाई ध्यानमा राखेर विकास गरिएको मोडल हो । यो गाडीले प्रोटोनको अत्याधुनिक विद्युतीय सवारी प्रविधिलाई नेपाली उपभोक्तामाझ अझ व्यापक बनाउने अपेक्षा गरिएको छ ।