प्रोटोनको दोस्रो ईभी ईमास ५ यही वर्ष आउने

नेपाली बजारमा हालै प्रोटोनको नयाँ ईभी ईमास ७ भित्रिएको छ । मलेसिया पछि अन्तर्राष्ट्रिय रुपमै पहिलो पटक नेपाली बजारमा भित्रिएको सो ईभीले अहिले चर्चा पाइरहेको छ ।

यसै सन्दर्भमा प्रोटोनको दोस्रो ईभीको रुपमा ईमास ५ (e.MAS 5) यही वर्ष डेब्यु हुने समाचार सार्वजनिक भएको छ । प्रोटोनका डेपुटी सीईओ रोस्लान अब्दुल्लाहले सञ्चारकर्मी र व्यवसायीहरुका बिचमा यो कुराको पुष्टि गरेका हुन् ।

मलेसियामा अर्को प्रतिस्पर्धी ब्रान्ड पेरोडुवाले ब्याट्री लिजिङ स्किमका साथ पहिलो ईभी मोडल सार्वजनिक गर्ने तयारी गरिरहेको अवस्थामा त्यसको जवाफको रुपमा अब्दुल्लाहले यो कुरा सार्वजनिक गरेको समेत बताइएको छ । यद्यपि प्रोटोनको सो नयाँ मोडलको अन्य विस्तृत जानकारी भने अब्दुल्लाह वा प्रोटोन कसैले पनि सार्वजनिक गरेका छैनन् ।

यो भन्दा पहिले पनि प्रोटोनको दोस्रो ईभी मोडलको वारेमा भने मलेसियामा धेरै चर्चा भइरहेको थियो । प्रोटोनका सीईओ लि चुनरोङले समेत यसको वारेमा जानकारी प्रदान गरेका थिए । त्यसैगरी विभिन्न चर्चाहरु समेत चल्ने गरेका छन् ।

चर्चा अनुसार प्रोटोनको दोस्रो ईमास मोडल जिलीको सानो ईभी जिओम जिङयुआनमा आधारित हुन सक्ने सम्भावना छ । यो भन्दा पहिले पनि प्रोटोनले आफ्ना डिलरहरुका बिचमा पुरानो टिजर भिडियो देखाएको थियो । यसमा देखिएको सिल्हुट जिङयुआन ह्याचब्याक जस्तै देखिएको थियो ।

जिङयुआन ह्याचब्याक १३५ किलोमिटर प्रतिघण्टाको गतिमा दौडन सक्छ र यसले ११४ एचपी अर्थात ८५ किलोवाटको पावर जेनेरेट गर्छ । यसमा भएको ३०.१२ किलोवाट आवरको सीएटीएलमा आधारित एलएफपी ब्याट्री प्याकले सीएलटीसी अनुसार ३१० किलोमिटर र अर्को ४०.१६ किलोवाट आवरको ब्याट्री प्याकले ४१० किलोमिटरको रेन्ज दिन्छ ।