१५० सिसी सेग्मेन्टमा यामाहा मोटरसाइकल, यस्तो छ ७ मोडलको मूल्य

काठमाडौं– नेपालको टु–ह्विलर बजारमा स्थापित ब्रान्ड हो यामाहा । स्पोर्टी लुक्स र नयाँ प्रविधीका कारण युवा राइडरको पहिलो रोजाई बन्न सफल यो ब्रान्डसंग हाल नेपाली बजारमा १० वटा मोडलका मोटरसाइकल उपलब्ध छन् । जसमध्ये ७ वटा मोडल १५० सिसी सेग्मेन्टमा पर्छ भने बाँकी दुईवटा २५० र एउटा १२५ सिसी सेग्मेन्टमा उपलब्ध छ ।

१५० सिसी सेग्मेन्टमा सबैभन्दा बढी मोडल उपलब्ध रहेका कारण पनि पछिल्लो समय सो सेग्मेन्टमा यामाहाले बजारको नेतृत्व लिँदै आएको छ । यो सेग्मेन्टमा यामाहासंग सबैभन्दा सस्तोमा २ लाख ७२ हजार पर्ने एसजेड आरआर देखी महंगेमा ६ लाख २० हजारको स्पोर्टस बाइक आर१५ एम भी४ सम्मका मोडल उपलब्ध छन् ।

आर१५ को भी३ भर्सनलाई भने नेपालका लागि आधिकारिक वितरक एमएडब्लु इन्टरप्राइजेजले ५ लाख २५ हजारमा बिक्री गर्दै आएको छ भने यसको भी४ ब्लु कलरलाई ६ लाख ५ हजार र रेड–ब्ल्याकलाई ५ लाख ९५ हजार पर्छ ।

यसैगरी डर्ट सेग्मेन्टमा ५ लाख ७० हजार पर्ने एक्सटिजेड उपलब्ध छ भने पछिल्लो समय युवा राइडरले सर्बाधिक रुचाएको मोडल एमटी १५ को मूल्य ५ लाख १० हजार र ५ लाख १५ हजार रुपैयाँ पर्छ । आर१५ र एमटी १५ मा यामाहाले १५५ सिसीको सिंगल सिलिन्डर, लिक्वड कुल्ड, एफआई इन्जिन दिएको छ ।

सबैभन्दा बढी बिक्री हुने एफजेड सिरिजमा यामाहासंग एफजेडएक्स, एफजेडएस भी२ तथा भी३ र एफजेड भी२ एबं भी३ मोडल उपलब्ध छ । जसमध्ये एफजेडएक्सलाई ४ लाख ४६ हजार, एफजेडएस भी२ को ३ लाख ६६ हजार तथा यसकै भी३ लाई ४ लाख ५ हजार रुपैयाँ पर्छ ।

साथै एफजेड भी२ को मूल्य ३ लाख ४० हजार र यसकै भी३ स्ट्यान्डर्डलाई ३ लाख ८० हजार पर्ने कम्पनीले जनाएको छ । एफजेड भी३ स्ट्यान्डर्डलाई कम्पनीले केही दिनअघि लन्च गरेको हो । यमाहाका यी सवैजसो बाइकमा एफआई इन्जिन जडान गरिएको छ ।