एमजी एस६ को मूल्य २ लाखले बढ्यो, अब कति ?

काठमाडौं–एमजी मोटर्सको नेपालका लागि आधिकारिक वितरक पारामाउन्ट मोटर्सले आफ्नो नयाँ विद्युतीय एसयूभी एमजी६ मा २ लाख रुपैयाँ मूल्य बढाएको छ ।

सरकारले आगामी आर्थिक वर्षको बजेटमार्फत विद्युतीय सवारी साधन (ईभी) मा लाग्ने करको संरचनामा परिवर्तन गरेसँगै कम्पनीले मूल्य समायोजन गरेको हो ।

बजेटअघि ६९ लाख ९९ हजार रुपैयाँमा बिक्री हुँदै आएको एमजी एस६ को मूल्य नयाँ बजेटपछि २ लाख रुपैयाँ बढेर ७१ लाख ९९ हजार रुपैयाँ पुगेको हो ।

एमजी६ मा ७७ किलोवाट आवरको ब्याट्री प्याक तथा १८० किलोवाट क्षमताको मोटर जडान गरिएको छ । यस कारको डब्लूएलटीपी रेन्ज ५३० किलोमिटर दाबी गरिएको छ ।

नेपालको विविध सडक अवस्थालाई ध्यानमा राख्दै यसमा १९५ एमएम ग्राउण्ड क्लियरेन्स प्रदान गरिएको छ भने रियर इन्डिपेन्डेन्ट सस्पेन्सन प्रणालीले अझ सहज, स्थिर तथा आरामदायी यात्रा सुनिश्चित गर्छ ।

रियर ह्विल ड्राइभ प्रविधि उपलब्ध गराइएको यस एसयूभीले उत्कृष्ट तथा डायनामिक ड्राइभिङ अनुभव प्रदान गर्ने वताइएको छ । साथै यसको प्रिमियम डिजाइन, स्मार्ट कनेक्टिभिटी तथा आधुनिक ईभी प्रविधिले यसलाई अझ आकर्षक र परिष्कृत इलेक्ट्रिक एसयूभीका रूपमा स्थापित गरेको छ ।