ओलाको इलेक्ट्रिक कार परियोजना हालको लागि स्थगित, थियो २०२४ मा लन्च गर्ने योजना

भारतको सबैभन्दा ठुलो इलेक्ट्रिक वाहन कम्पनी ओला इलेक्ट्रिकले आफ्नो इलेक्ट्रिक कार लन्च गर्ने योजना स्थगित गरेको छ । हाल कम्पनीले आफ्नो विद्युतीय स्कुटर व्यवसायमा केन्द्रित हुन यो निर्णय गरेको हो ।

कम्पनीले १५ अगस्ट २०२२ मा आफ्नो इलेक्ट्रिक कारको झलक देखाएको थियो । कम्पनीले सन् २०२४ सम्ममा  ४ सेकेन्डमा १०० किलोमिटर प्रतिघण्टाको गति लिन सक्ने इलेक्ट्रिक स्पोर्ट्स कार लन्च गर्ने योजना बनाएको थियो ।

ओलाले आफ्नो इलेक्ट्रिक कार स्थगित गर्नुको कारण भारतमा इलेक्ट्रिक कार चार्ज गर्ने आधारभूत पूर्वाधारको अभाव हुनु हो । रिपोर्टका अनुसार ओलाको कार प्रोजेक्ट कम्तिमा २ वर्षका लागि स्थगित भएको छ । यस समयमा कम्पनीको फोकस दुई पाङ्ग्रे सवारी साधन बिक्री र ब्याट्री उत्पादनमा हुनेछ । तर, कम्पनीले यस विषयमा कुनै प्रतिक्रिया दिएको छैन ।

रिपोर्टका अनुसार ओलाले इलेक्ट्रिक कार परियोजनाका लागि छानिएका १०० कर्मचारी मध्ये ३० प्रतिशतले आफ्नो जागिर छोडेका छन् ।

कम्पनीले अगस्टमा आइपीओ पनि ल्याउने तयारी गरिरहेको छ । त्यसैले पनि सो इलेक्ट्रिक कार आयोजना रोकिएको हो । ओला आईपीओबाट ६६० मिलियन डलर उठाउन चाहन्छ । सो आईपीओ यस वर्ष भारतको सबैभन्दा ठुलो आईपीओ मध्ये एक हुनेछ ।

ओलाको पहिलो कार उत्कृष्ट प्रविधिले सुसज्जित हुने बताइएको छ । यो इलेक्ट्रिक सेग्मेन्टमा बनाइने भारतको पहिलो स्पोर्ट्स कार हुनेछ । सो कार चाबीविहीन हुनुका साथै ह्यान्डल लेस पनि हुनेछ । साथै, कारको ढोकामा ह्यान्डल पनि छैन ।