आयात रोकिँदा अभाव हैन, शोरुममा थन्किए सवारीसाधन, भन्सार यार्डमा ५ हजार बढी गाडी

सरकारले इन्धनबाट चल्ने प्यासेन्जर कार र २५० सीसी माथिका मोटरसाइकलको आयात बन्द गर्दा बजारमा यी साधनको चरम अभाव हुने अनुमान लगाइएको थियो । यी साधनको आयात पूर्णरुपमा बन्द गरेको २ महिना पुग्नै लाग्दा बजारमा अहिले अभाव हैन उल्टै शोरुममा यस्ता साधन थन्काएर राख्नु परेको भन्दै व्यवसायीले दुखेसो व्यक्त गरेका छन् ।

वैंक तथा वित्तीय संस्थाले अटो लोनमा कडाई गर्नु, व्याजदर बढेर १५ प्रतिशतमाथि पुग्नु र बजारमा तरलताको अभावका कारण स्टकमा रहेका गाडी समेत बिक्न छाडेको नाडा अटोमोबाइल्स एसोसिएसन अफ नेपालका अध्यक्ष ध्रुव थापाले बताए । यो अवस्था गाडीमा मात्र नभएर मोटरसाइकल तथा स्कुटरमा समेत लागु भएको उनको भनाइ छ । उनका अनुसार अहिले सवारीसाधनको बिक्री पुरै बन्दाबन्दीको अवस्थामा रहेको छ ।

बजारमा माग नै नभएपछि आयात रोक्नुअघि खोलिएको एलसीको आधारमा नेपाल आउने तयारीमा रहेका ठूलो संख्यामा कार तथा अन्य कमर्सियल भेइकल भन्सार यार्डमा थन्किएर वसेको थापाले बताए । उनी भन्छन, ‘नेपाल वारी र पारी गरी भन्सार यार्डमा मात्र अहिले ५ हजार भन्दा बढी गाडी थन्किएर वसेको जानकारी हामीलाई प्राप्त भएको छ । अहिले भन्सार यार्ड पुरै सवारीसाधनले भरिभराउ भएको अवस्था छ । बजारमा माग नै नभएपछि व्यवसयीले गाडी छुटाउन सकिरहेका छैनन् । विलम्व शुल्क तिरेरै भएपनि भन्सारमा थन्काउनुको विकल्प नभएपछि यस्तो भएको हो ।’

‘अवस्था सामान्य हुँदो हो त बजेट आउनु अघिको हालको अवस्थामा व्यवसायीलाई गाडी भित्र्याउन भ्याइनभ्याई हुने अवस्था रहन्थ्यो । प्रायः सबैजसो वजेटमा सवारीसाधनको कर बढ्दै आाइरहेका कारण पनि व्यवसायीले यो समयमा अत्याधिक धेरै संख्यामा गाडी मगाउने गर्थे । तर अहिले अवस्था त्यस्तो छैन । कर वढेपनि बजारमा माग नबढेसम्म भन्सार यार्डबाट गाडी भित्र्याउने मनस्थितिमा व्यवसायीहरु रहेको पाइदैन । यद्यपि केही व्यवसायीले भने कर बढ्ने अनुमान लगाउँदै आयात बढाउन थालेका छन्’ उनले नेपाल अटोसँग भने ।

बढ्दो आयातका कारण विदेशी मुद्राको संचितिमा दवाव महसुस गर्दै सरकारले यही आसार मसान्तसम्मका लागि इलेक्ट्रिक वाहेक अन्य सबै प्रकारका प्यासेन्जर कार र २५० सीसी माथिका मोटरसाइकलको आयातमा पूर्ण रोक लगाएको छ । उक्त रोकावट असार मसान्तपछि पनि लम्विने भन्दै केही व्यवसायी सरकारको निर्णय उल्टिने विषयमा सशंकित वनिरहेका छन् भने अर्कोतर्फ इलेक्ट्रिक गाडीमा समेत कर बढ्न सक्ने आँकलन गरिएको छ ।