अटो लोनमा एनएमबि बैंकको सक्रियता : ५ वर्ष सम्म एउटै ब्याजदर, इलेक्ट्रिकमा सहुलियत

काठमाडौं – एनएमबि बैंकले अटो लोनमा सक्रियता देखाएको छ । बजारमा उपलब्ध अटो लोन मध्ये एनएमबि बैंकले उपलब्ध गराएको अटो लोन कम ब्याजदरको हुनुका साथै ५ वर्ष सम्म एउटै दरमा समेत उपलब्ध हुने व्यवस्था गरिएको छ ।

हाल एनएमबि बैंकले अन्य गाडीका लागि ८.४९ प्रतिशतका साथै इलेक्ट्रिक गाडीका लागि बेस रेट अर्थात ७.३३ प्रतिशतमै अटो लोन उपलब्ध गराइरहेको छ ।

असारको प्रारम्भ देखि लागू भएको स्किम अनुसार हाल ४० भन्दा बढी गाडीका लागि अटो लोन स्वीकृत भइसकेको एनएमबि बैंक स्रोतले बताएको छ । यद्यपि बजारमा इलेक्ट्रिक गाडी भित्रिने क्रममा रहेका र गाडी भित्रिने क्रम बढ्दै जादा अटो लोन लिने ग्राहकको संख्या त्यही अनुसार बढ्ने अपेक्षा गरेको बैंक स्रोतको भनाइ छ ।

हाल अन्य गाडीमा ५० प्रतिशत सम्म र इलेक्ट्रिक गाडीमा ८० प्रतिशत सम्म फाइनान्स सुविधा उपलब्ध हुन्छ । बैंकले अन्य गाडीका लागि शून्य दशमलव ७५ प्रतिशत सेवा शुल्क लिने भए तापनि इलेक्ट्रिक गाडीका लागि शून्य दशमलव ५० प्रतिशत मात्र शुल्क लिने गरेको छ । इलेक्ट्रिक गाडीका लागि यो बैंकको तर्फबाट पुरा गरिएको सामाजिक उत्तरदायित्व भएको बैंकको भनाइ छ ।

आवश्यक सबै कागजात पुरा भएमा २४ घण्टा भित्रै कर्जा स्वीकृत हुने समेत बैंकले जनाएको छ ।