नेक्सन ईभी अव दुई ब्याट्री प्याक अप्सनमा मात्र, बन्द भयो ४०.५ किलोवाट आवर भेरिएन्ट

टाटा मोटर्सले नेक्सन ईभीको ४०.५ किलोवाट आवर ब्याट्री भेरिएन्ट बन्द गरेको छ । उक्त भेरिएन्ट बन्द भएसंगै नेक्सन ईभी अब ३० किलोवाट आवर र ४५ किलोवाट आवर भेरिएन्टमा मात्र उपलब्ध हुनेछ ।

टाटा मोटर्सले एलआर ४०.५ किलोवाट आवर भेरिएन्टलाई ३० र ४५ किलोवाट भेरिएन्टको बीचमा राखेको थियो । यसको रेन्ज ३९० किलोमिटर दाबी गरिँदै आएको थियो ।

मिड–स्पेक भेरिएन्ट बन्द भएपछि नेक्सन ईभी अब १० भेरिएन्टमा मात्र उपलब्ध हुने जनाइएको छ । यसको ३० किलोवाट भेरिएन्ट क्रिएटिभ प्लस, फियरलेस, फियरलेस प्लस, फियरलेस प्लस एस र एम्पावरेड ट्रिममा उपलब्ध छ ।

यसैगरी, ४५ किलोवाट आवर भेरिएन्ट क्रिएटिभ, फियरलेस, एम्पावर्ड, एम्पावर्ड प्लस र रेड डार्क ट्रिममा उपलब्ध छ ।

उत्पादन बन्द गरिएको एलआर भेरिएन्ट यसअघि नेपाली बजारमा नेक्सन ईभी म्याक्सको नामले बिक्री हुँदै आएको थियो ।

नेपाली बजारमा यसको ४५ किलोवाट आवर भेरिएन्ट नेक्सन के३ नामले बिक्री हुँदै आएको छ । हालसालै नेपाल आएको यस ईभीको मूल्य ४९ लाख रुपैयाँ निर्धारण गरिएको छ ।