साउदीका खेलाडीलाई रोल्स रोयस कार दिने कुरा झुट, खेलाडी र प्रशिक्षकले नै गरे खण्डन

जारी फिफा विश्वकपमा साउदी अरवले अर्जेन्टिनालाई हराएपछि साउदीका राजकुमार मोहम्मद बिन सलमानले टिमका सबै खेलाडीलाई रोल्स रोयस फेन्टोम कार दिने घोषणा गरेको समचार झुट सावित भएको छ ।

एरी न्युज नामक एक भेरिफाइड ट्विट एकाउन्टबाट उक्त समाचार पोस्ट गरिएपछि विश्वभर साउदी राजकुमारको यो कदमका विषयमा अनेकन अड्कलबाजी भइरहेका थिए ।

लाखौँ प्रयोगकर्ताले आफ्नो धारणाहरू राखेका थिए । अझै पनि त्यो क्रम रोकिएको छैन । ४ लाख ५० हजार डलरमाथि पर्ने उक्त कारको सत्यताका विषयमा एक पत्रकारले साउदी खेलाडीसँग जवाफ मागेका थिए ।

अरब न्यूज नामक एक वेवसाइटले समाचारको फ्याक्ट चेक गर्ने क्रममा यो असत्य भएको बताएको छ । समाचारअनुसार साउदी अरेबिया फुटबल टिमका एक खेलाडी सालेह अलशहरी र प्रशिक्षक हर्वे रेनार्डले पत्रकार सम्मेलनमा भाइरल भइरहेको समाचारको खण्डन समेत गरेका थिए । उनीहरुले यो समचारमा कुनै सत्यतता नरहेको बताएका हुन् ।