फर्केर हेर्दा २०२४ : ७ करोड पर्ने बीएमडब्लु एक्स७ सहित करोड माथिका ८ नयाँ ईभी भित्रिए नेपाल

काठमाडौं– वर्ष २०२४ पुरै ईभीमय बनेर बिदा भएको छ । यसवर्ष नेपाली बजारमा डेढ दर्जन नयाँ ब्रान्डका विद्युतीय कार (ईभी) भित्रिए । नेपाल भित्रिएका अधिकांश नयाँ ब्रान्ड चीनबाट आएका हुन् । १९ लाख ९६ हजार पर्ने केईको क्युट ०२ देखि ७ करोडको बीएमडब्लु एक्स७ एक्स ड्राइभ ४० सम्मका ईभीले बजारमा चर्चा पाए ।

गत वर्ष नेपाल आएका दुई दर्जन ईभी मोडलमा ८ वटा करोडमाथिका ईभी छन् । जसमा सबैभन्दा महंगो मुल्यको ईभी बीएमडब्लु एक्स७ एक्स ड्राइभ ४० हो । यो कार नेपाल आएको १ हप्ता नबित्दै बिक्री भएको थियो । लक्ष्मी प्रिमियमले ल्याएको सो प्रिमियम एसयूभीको मूल्य ७ करोड हाराहारी पर्ने बताइएको छ ।

करोडमाथिको ईभी आयात गर्ने कम्पनीमा बीवाईडीको नेपालका लागि आधिकारिक वितरक साइमेक्स इंक प्रालि पनि दर्ज भएको छ । कम्पनीले वर्ष २०२४ को सुरुवातमै लक्जरियस सेडान सिल भित्र्याएको थियो । तीन भेरिएन्टमा आएको सिल डाइनामिकको मुल्य १ करोड ५ लाख, प्रिमियमको १ करोड ३९ लाख र पर्फमेन्सको १ करोड ८५ लाख रुपैयाँ पर्छ । बीवाईडी सिलमा ६१.४४ किलोवाट आवरको ब्याट्री प्याक तथा ३९० किलोवाट क्षमताको मोटर जडान गरिएको छ ।

यस वर्ष कियाले आफ्नो फ्ल्यागशिप एसयूभी ईभी९ लाई नेपाल ल्यायो । नेपालका लागि आधिकारिक वितरक कन्टिनेन्टल ट्रेडिङ इन्टरप्राइजेजले यो गाडीको मूल्य १ करोड ८० लाख तोकेको छ । ईभी९ मा ७६.१ किलोवाट आवरको ब्याट्री प्याक तथा १६० किलोवाट क्षमताको मोटर जडान गरिएको छ ।

नाडा अटो शो २०२४ को अवसर पारेर एमजी नेपालले आफ्नो प्रिमियम ईभी साइबरस्टरलाई नेपाल ल्याएको थियो । सो समय दुई युनिटमात्र साइबरस्टर नेपाल आएकोमा तत्कालै सोल्ड आउट भएको थियो । साइबरस्टरको मूल्य १ करोड ६८ लाख पर्छ । यस ईभीमा ७७ किलोवाट आवरको ब्याट्री तथा २५० किलोवाट क्षमताको मोटर जडान गरिएको छ ।

सीजी मोटर्स र एमएडब्लु ग्रुपले संयुक्त रुपमा ल्याएको अवतार ११ ले निकै चर्चा बटुल्यो । ९० किलोवाट आवर र ११६ किलोवाट आवर ब्याट्री प्याकमा उपलब्ध यस ईभीको मुल्य क्रमशः १ करोड ४५ लाख र १ करोड ६० लाख पर्छ । अवतार ११ मा १९० किलोवाट क्षमताको मोटर राखिएको छ ।

वर्ष २०२४ जिकर, टेस्ला र स्काइवेलले पनि करोड माथिका ईभी नेपाल ल्याए । जिकर एक्सको फ्ल्यागशिप मोडल ३१५ किलोवाट अल ह्विल ड्राइभ नेपाल आएको हो । ६६ किलोवाट आवरको ब्याट्री प्याक जडान गरिएको सो ईभीको मुल्य १ करोड ५५ लाख पर्छ । जिकरलाई शारडा ग्रुप अन्तर्गतको पायोनियर मोटोकर्पले भित्र्याएको हो ।

यसैगरी, टेस्लाले मोडल ३ को फेसलिफ्ट भर्सनलाई समेत यसै वर्ष नेपाल ल्यायो । फिचर र लुक्स अपडेट भएर आएको सो ईभीको मूल्य १ करोड ३५ लाख पर्छ । टेस्ला मोडल ३ मा ५८ किलोवाट आवरको ब्याट्री प्याक र १७० किलोवाट क्षमताको मोटर जडान गरिएको छ ।

२०२३ कै नाडा आटो शोमा नेपाल आउने चर्चा पाएर बुकिङ समेत पाएको स्काइवेल ईटी ५ पनि यसै वर्ष नेपाल आयो । जी मोटर्सले ल्याएको यस एसयूभीको मूल्य १ करोड ९ लाख पर्छ । स्काइवेल ईटी ५ मा ८५.९ किलोवाट आवरको ब्याट्री प्याक तथा १५० किलोवाट क्षमताको मोटर जडान गरिएको छ ।