अब बीवाईडी एट्टो ८, २०२५ ग्वाङझाउ अटो शोमा सार्वजनिक

बीवाईडीले २०२५ ग्वाङझाउ अटो शो मा अपग्रेडेड टाङ एल अर्थात अन्तर्राष्ट्रिय रुपमा परिचित एट्टो ८ अर्थात सिलायन ८ सार्वजनिक गरेको छ । अत्याधुनिक प्रविधि, एड्भान्स्ड ड्राइभर असिस्टेन्स फिचर र बोल्ड न्यु स्टाइल सहितको बीवाईडी एट्टो ८ ६ भेरिएन्टमा उपलब्ध हुनेछ । यसको मूल्य २ लाख १४ हजार ८०० युआन अर्थात करिव ३० हजार २५० डलर देखि २ लाख ७४ हजार ८०० युआन अर्थात करिव ३८ हजार ६२० डलर सम्म हुनेछ ।

सो अपडेट गरिएको एसयूभीमा बीवाईडीको ड्रागन फेस डिजाइनलाई निरन्तरता दिइएको छ, तर यसलाई अझै प्रवाहयुक्त र डाइनामिक लुक प्रदान गर्न मोडिफाइड फ्रन्ट ‘ड्रागन ह्विसकर्स’ प्रयोग गरिएको छ । थर्ड रोका यात्रुलाई अझै प्रकाश दिन र वाहिरी दृश्य स्पष्ट देखाउनका लागि डी–पिलरलाई रिडिजाइन गरिएको छ भने छानामाथि राखिएको लिडार युनिटले ‘इन्टेलिजेन्ट ड्राइभिङ’ क्षमतामा उल्लेखनीय सुधार ल्याएको छ। पछिल्लो भागमा चिनियाँ संस्कृति झल्कने फिनिक्स विङ र ब्याम्बु क्राफ्ट टेलल्याम्प डिजाइन विशेष आकर्षण बनेका छन् ।

क्याबिनभित्र प्रवेश गर्दा बीवाईडी एट्टो ८ को नयाँ इन्टेरियर लेआउट एकदमै प्रिमियम र सांस्कृतिक स्पर्शयुक्त महसुस हुन्छ। ‘प्यालेस–इन्स्पायर्ड’ थ्रीडी–कट सरफेस, ब्याम्बु–उड ट्रिम र लेयर्ड ड्यासबोर्डले गाडीलाई स्तरिय गहिराइ र आधुनिकता दिन्छ।

बीवाईडीले यसपालि इन्टेरियरलाई मात्र सुन्दर बनाएको छैन, गड्स आई बी लेजरमा आधारित डीपाइलट ३०० उच्चस्तरीय ड्राइभर–असिस्टेन्स प्रणाली सबै भेरिएन्टमा स्ट्यान्डर्ड रूपमा दिएको छ।

यसको ईभी भर्सनमा सिंगल र ड्युअल मोटर सेटअप रहेको छ । ड्युअल मोटर मोडलले फ्रन्टमा २३० किलोवाट र रियरमा ५८० किलोवाट उत्पादन गर्छ, जसले ३.९ सेकेन्डमा ० देखि १०० किलोमिटर सम्मको दुरी पार गर्न सक्छ । सो ईभीमा १००.५३१ किलोवाट आवरको सेकेन्ड जेनेरेसन लिथियम आइरन फस्फेट ब्लेड ब्याट्री प्रयोग गरिएको छ, जसले सीएलटीसी रेन्ज ५६०, ६०० र ६७० किलोमिटर सम्मको रेन्ज दिन्छ ।

गाडीमा नयाँ क्याबिन सफ्टवेयर र युजर इन्टरफेस अपडेट गरिएको छ, जसमा एडेप्टिभ ब्राइटनेस सहितको डिलिंक १५०, कस्टमाइजेबल सिजनल थिम्स र थ्री इन्टरएक्टिभ मस्कट क्यारेक्टर समेत समावेश छन् ।

त्यसैगरी एड्भान्स ड्राइभिङ फिचरमा अब ‘पार्किङ स्पट टु पार्किङ स्पट’ अटोनोमस नेभिगेसन समेत हुनेछ, जसले गाडीलाई अटोमेटिक रुपमा बाहिर निस्कन, अवरोध पत्ता लगाउन र निश्चित स्थानमा पार्क गर्न सहयोग गर्छ ।

नेपाली बजारमा समेत हाल बीवाईडी १, एट्टो २ र एट्टो ३ उपलब्ध छन् । एट्टो ८ भने अलि माथिल्लो लेभलको गाडी हो । भविष्यमा यो गाडी नेपालमा पनि आउन सक्ने सम्भावना भने रहन्छ ।