बाइकर्स नेपालले ल्यायो ५०० सीसीको नयाँ ब्रान्डको स्पोर्ट्स बाइक नेपालमा, यस्तो छ मूल्य र फिचर

काठमाडौं – नेपाली बजारमा पहिले देखि नै क्रस एक्स ब्रान्डका मोटरसाइकल बिक्री गरेर चर्चामा रहेको बाइकर्स नेपालले जेडएक्स मोटो ब्रान्डको नयाँ स्पोर्ट्स मोटरसाइकल भित्र्याएको छ । हालै गैरीधारास्थित शोरुममा सजाएर राखिएको अल न्यु जेडएक्सजेसी ५००आरआर मोडलको सो स्पोर्ट्स बाइकलाई कम्पनीले थ्रिलका लागि निर्माण गरिएको स्पोर्ट्स मेसिन भनेको छ ।

यसमा ४७० सीसीको इनलाइन फोर सिलिन्डर इन्जिन रहेको छ, जसले १३,५०० आरपीएममा ८४ एचपी पावर र ११,५०० आरपीएममा ४६ एनएम टर्क जेनेरेट गर्छ । २४६ किलोमिटर प्रतिघण्टा सम्मको टप स्पिड, १६८ किलोग्रामको च्यासिस र १५ लिटरको इन्धन ट्यांकी रहेको यो मोटरसाइकलको सिटको उचाई ८०० एमएम रहेको छ ।

त्यसैगरी यो मोटरसाइकलमा एबीएस, ट्रयाक्सन कन्ट्रोल, क्विक सिफ्टर, लिन एङगल डिस्प्ले, अटो हेडलाइट सिस्टम, राइडिङ मोड, जीपीएस तथा इन्फोटेनमेन्ट सिस्टम, स्टेयरिङ स्टेब्लाइजर र सिंगल साइडेड स्विङआर्म लगायतका विभिन्न फिचर रहेका छन् ।

नेपाली युवा राइडरहरुका लागि एड्भेन्चर र स्पोर्ट्स मोटरसाइकल बिक्री–वितरण गरिरहेको बाइकर्स नेपालले अब नयाँ मोडलको मोटरसाइकल भित्र्याएको बताएको छ । हाल यसको बुकिङ र बिक्री माग अनुसार उपलब्ध भइरहेको समेत बताइएको छ ।

औपचारिक रुपमा लन्च नभएको कारणले पनि यसको औपचारिक मूल्य कम्पनीले सार्वजनिक गरेको छैन । यद्यपि यसको मूल्य १७ लाख रुपैयाँ हाराहारी हुने बताइएको छ ।

नेपाली बजारमा विभिन्न कम्पनीका स्पोर्ट्स र एड्भेन्चर बाइकहरु उपलब्ध छन् । आगामी दिनमा जेडएक्सजेसी ५००आरआरले होन्डा, केटीएम, बीएमडब्ल्यु लगायतका मोटरसाइकलसँग प्रतिस्पर्धा गर्नेछ ।