विद्यूतीय सवारी साधनमा लगाइएको करमा पुनर्विचार गर्न नाडाको आग्रह

काठमाडौं – हालै अर्थमन्त्री जनार्दन शर्माद्वारा प्रस्तुत बजेटमार्फत १०० किलोवाट भन्दा बढी क्षमताका विद्युतीय सवारी साधनको भन्सार तथा अन्तःशुल्कमा लगाइएको अत्यधिक कर वृद्धि वारेमा नाडाले आफ्नो धारणा सार्वजनिक गरेको छ ।

आज एक कार्यक्रमको आयोजना गरी नाडाले यसबाट सरकारले विद्युतीय सवारी साधनलाई प्रोत्साहित गर्नुपर्नेमा दुरुत्साहन गरेको बताएको छ ।

नाडा अध्यक्ष ध्रुब थापा र ईभी समिति संयोजक राजनबाबु श्रेष्ठका साथै नाडा पदाधिकारीहरुले यसबाट पेट्रोलियम पदार्थको विकल्पको रुपमा विद्युतीय सवारी साधन प्रयोग गर्न प्रोत्साहन गर्न र नेपालको भौगोलिक अवस्था अनुसार २०० किलोवाट क्षमताका विद्युतीय सवारी साधनहरुलाई समेत पुरानै व्यवस्था अनुसार भन्सार महसुल तथा अन्तःशुल्क कायम गर्न अनुरोध गरे ।

सरकारले विदेशी मुद्राको सञ्चितिमा सुधार ल्याउन असार मसान्त सम्म निजी प्रयोजनका सवारी साधनहरुको आयातमा प्रतिबन्ध लगाएको र यसबाट विदेशी मुद्रा सञ्चिति र शोधनान्तर स्थितिमा खासै असर पार्ने नदेखिएकोले यसको समाधानका लागि समेत सरकारलाई अनुरोध गरिएको छ ।

त्यसैगरी २०० सीसी भन्दा बढी क्षमताका मोटरसाइकलको अन्तःशुल्क र भन्सार महसुलमा गरिएको वृद्धिले यस्ता मोटरसाइकलको कारोबारमा संलग्न व्यवसायीहरुले व्यवसाय नै बन्द गर्नु पर्ने अवस्था आएको भन्दै यसमा पुनर्विचार गर्न समेत नाडाले अनुरोध गरेको छ ।